Күйөөм сийип алыпмын деп шымын кайра-кайра жыттаган. Үй-бүлөлүк күлкүлүү окуялар
Bilesinbi.kg окурмандарынын башынан өткөн күлкүлүү окуялары менен бөлүшүүнү чечти. Эгер сизде дагы эсиңизде калган позитивдүү окуя бар болсо, биз менен байланышыңыз.
Шымына сийип алган күйөө
Бир күнү күйөөм бутунда тура албай мас болуп келди. Мындай абалда аны биринчи жолу көрүшүм. Досунун кыздуу болгонун майрамдашкан экен. Эч нерсени билбейт, шымы суу. Чечинтип жаткырып койдум. Шымына сийип койгонбу десем жыттанбайт. Эртеси ойгонуп, кантип келип калганын сурады. “Шымыңа сийип алгыча ичипсиң, абайлабайсыңбы”, - деп кабагымды түйүп сыртка чыгып кеттим. Терезеден карасам шымын кайра-кайра жыттап жатыптыр. Көзүмө карай албай уялып жүрдү. Мен жыргап күлөм. Эки-үч күндөн кийин көчөдөн сүйүнүп келди. Эмне болгонун сурасам “мен шымыма сийбептирмин, соолугам деп арыктагы сууга жатыпмын, досторум айтты”,- деди. kojoeva_bazargul
Тиши жок жана кал баш байке
Студент кез. Дем алыш күндөрү официант болуп иштейм. Ар дайым эки чоң киши келип тамактанышат. Бири-бирин “кал баш” жана “тиши жок” деп маскаралап күлө беришет. Тейлеп калсам, "кимибизге келин болосуң" дешет. Мен да жөн калбай, “кимиңердин балаңар жакса ошого келин болом, эмкиде балдарыңарды ээрчите келгиле”, -деп койдум. Бир күнү экөө тең бадарын ээрчитип келишиптир. “Тиши жок” дегендин уулу менен жылдызыбыз келишип сүйлөшүп калдык. Азыр ошол тиши жок байке кайын атам, эки небересин эркелетип чоң ата болуп отурат. milliondon.biroo
Бейтааныш кол
Менин баскан турганым өзүнчө эле ха-ха. Оң колумду мурдумдун үстүнө коюп уктап калыпмын. Түндө көзүмдү ачсам, бирөөнүн колу бетимде турат. Дароо сол колум менен бир чаап жатпайынбы. schastlivayaa_97
"Алоо!"
Үйгө киши келиптир. Дарбаза такылдайт. Чыгып эле "Алоо!" деп кыйкырсам эч ким унчукпайт. Ачуум келип үйгө кирип кеттим. Кийин эстеп алып аябай күлдүм. raimbekova0907
Тукум тууган жеңе
Мен 6-класста окуп жүргөндө байкем үйлөндү. Дарыянын боюнда жашайбыз. Огород кенен, 20-30дай өрдөк багабыз. Жумурткаларын күндө атам барып алат. Бир күнү барып таппай калыптыр. Түшкү тамактанууга отурганда атам “бүгүн өрдөктөр...” деп сөз баштаганда эле, жеңем сөзүн жула калып, “ии, ата, бүгүн мен дарыянын боюнда алты тукум туудум” десе болобу. Баарыбыз күлүп эле жатып калдык. al.tynai5769
Кайын атасын урушкан келин
Атасы балама оюнчук гитара алып бериптир. Урушсам болбой, кечке кулак-мээни жеп ойной берди. Бир күнү кино көрүп, кечки тамак ичип отурсак дагы гитаранын үнү чыкты. “Кулагы жок, таштачы”,- деп, катуу кыйкырып бурулсам, кайын атам баламды алдына алып алып, гитара чертип отуруптур. Уялганымды айтпагыла. aikosha1020
Снайпер
Бир күнү таенем:
- Мага дары ала келгиле.
- Дарыңыздын аты эмне?
- Снайпер.
- Таене снайпер деген дары жок.
- Баш ооруганда ичет го дейт.
- Цинепар дегенби?
- Ооба, ошол болсо керек. baetova11
Сасык келин
Жаны келин болуп барган кез. Конокко баратып балчык суусуна жыгылып калдым. Аябай сасык экен. Көйнөктөрүмдү жууйун десем, крандагы суу токтоп калса болобу. Күйөөм экөөбүз издеп бир баня таптык. Ошол жерге кирип кийимдеримди жууп, сыгып туруп кайра кийип алдым. Июль айы. Көпкө чейин сасып жүргөнмүн. aruzatfiraia
Көрүмчү
Жакында болгон окуя. Үйдө жалгыз элем. Уктап кетипмин. Бир маалда телевизордун үнүнөн чочуп ойгондум. Үйдө эч ким жок болсо, аны ким жандырмак эле деп корктум. Арбактар оюма келип, сыртка атып чыктым. Үйгө кире албай, ары-бери басып жүрө бердим. Караңгы кире баштады. Анан отуруп жакшылап ойлонсом, окуя мындай болгон экен: телевизор көрүп отурсам свет өчүп калат. Анан уктап калыпмын. Ал ортодо свет күйүп телевизор жанган экен. jalievamunaraaltynbekovna
Башкы беттеги илюстративдүү сүрөт.
Бул жерден башка кызыктуу макалаларды окусаңыз болот:
Күйөөм экөөбүздү эки жыл баккан кайын агама ыраазымын
Күйөөм “менден балалуу боло албайсың, кетип эле кал” деп ыйлады
Кайын энемди көп сүйлөйт дешип жанына отургандан качышат
Эжем бай жерге турмушка чыккандан бери апам менен сүйлөшпөй калды
Кайын сиңдилүү болгондон коркуп, карындашы жок жигитке тием дечүмүн