Жигитим "балаңа ата болуп берем" деген сөзүнө турбаганы үчүн милицияда отурат
Bilesinbi.kg окурмандарынын баштан өткөргөн ар түрдүү окуялары менен бөлүшүп келет. Бул ирет бир окурманыбыздын катын жарыялайбыз. Эгер сизде дагы кызыктуу баян бар болсо, бизге жөнөтүңүз.
Сени жолуктурган тагдырыма ыраазы болгонума азыр өкүнүп отурам. Мен да сени сенден кем калбай сүйгөнмүн. Биринчи турмушумдан жаралган балам менин бүтүндөй жашоом экенин айтканымда ата болуп берээриңди билдиргенсиң. Ошол сөз мага өзгөчө таасир калтырып, бирок ага карабай сени сынап да көрдүм. Баламды алгачкы жолу көргөнүңдө кучагыңа кысып, аны менен бат эле дос болуп кеттиң эле. Мен түбөлүк бактымды таптым деп ойлогом.
Колумду сурап алып кеттиң. Эки жумадан кийин баламды алып келдик. Ага кылган алгачкы 6-7 айдагы жакшылыктарыңды, мээримиңди адилеттүүлүк үчүн унутпаймын. Бирок, андан кийин эмне кылдың?
Сени ата катары кабыл алып калган наристени алгачкы жолу урганыңда жүрөгүм тилингенине карабай өзүмдү соороттум эле. Бардык эле ата-энелер балдарын анча-мынча какыс-кукус кылып тарбиялап жүрүшпөйбү дегем. Бирок, тилекке каршы сеники токтогон жок. Мен жокто денесин көгала кылып сабаганыңдагы абалымды азыр эстегим келбейт.
Эки айда алты жолу сабадың. Же мен же бала сага жамандык кылбаса. Бир учурдагы сылык, күйүмдүү, көзүмдүн карегин карап турган түгөйүм ушунчалык өзгөргөнүңө таң каламын. Мындай сапаттарыңды баласыз жашаган алты айда көрсөтсөң кана. Жок дегенде ал сени ата катары кабыл ала электе билгизип, мага да, ага да үмүт бербесең кана. Сени сүйүп, жакаңды кирдетпей карап, колумдан келгендин баарын кылдым. Муну балам жаныбызга келе электе да жасачумун. Наристени акыркы жолу мас болуп келип төпөштөгөнүң, биздин эми жолубуз бир эмес деген белги.
Азыр мен баламдын чүнчүгөн көздөрүн көрүп кечирим сурап отурам. Бактылуу балалыкты тартуулай албаганыма өкүнүп отурам. Өмүрдү сага арнабайм. Балага кордук көрсөткөнүң үчүн милицияда отурасың. Арызды кайтарып албайм. Сабаганың үчүн эмес, балаңа ата болуп берем деп алдап, сөзүңө турбаганың үчүн! Балага үмүт берип, бирок кийин атаң эмесмин деген сөзүң үчүн!
Азыр мен экөөбүздүн ортобуздан бала жаралбаганына кубанып отурам. Эгер наристебиз төрөлсө өгөй балаң мындан да катуу кор болооруна ишенип турам. А мен баламды таштабайм. Ал үчүн баарын кылам!
Башкы беттеги илюстративдүү сүрөт.
Бул жерден башка кызыктуу макалаларды окусаңыз болот:
Жигитим экөөбүз гинекологго текшерилгени кирсек дарыгер жашып жиберди