Кичинекей бала грипп болгондо кантип дарылоо керек?

Грипптин симптомдору: мурундун бүтүшү, жөтөл, тамак оорусу, дене табынын жогорулашы жана булчуңдардын оорушу. Грипптин симптомдорун үй шарттарында эс алуу, суюктук жана парацетамол ичүү аркылуу дарылоого болот. Эгерде балаңыздын симптомдору жакшырбаса же балаңыз абдан начар болсо, дарыгерге кайрылыңыз. Грипптин жайылышына бөгөт коюу үчүн колду жуу, жөтөлгөндө жана чүчкүргөндө ооз жана мурунду жабуу керек.  

Грипп жөнүндө

Грипп же курч дем вирустук оорулары (КДВО) вирустан улам пайда болот. Грипп вирустарынын көптөгөн ар кандай түрлөрү бар. Эң кеңири таралган түрлөрү А жана В болуп саналат.

Грипптин вирустары дайыма өзгөрүп турат. Ошондуктан сиз грипп менен көп жолу ооруп калууңуз мүмкүн.

Грипп көбүнчө кыш мезгилинде болот. Кээде вирус кеңири жайылып, "эпидемияны" пайда кылат. Эпидемия болгондо грипптен адаттагыдан көп адамдар жабыркайт.

Грипп өтө жугуштуу жана ал сүйлөшүү, жөтөлүү жана чүчкүрүү аркылуу жайылышы мүмкүн. Вирус ошондой эле оорулуу адамдын колунда жана ал байланышта болгон буюмдарда жашай алат.

Грипптин симптомдору

Грипптин симптомдору: мурундун бүтүшү, жөтөл, тамак оорусу, дене табынын жогорулашы, баш оору жана булчуңдардын оорушун камтыйт.  Сиздин балаңыз чыйрыгышы, дене табы жогорулашы ыктымал.

Грипп кээде жүрөк айлануу, кусуу жана ич өткөккө алып келиши мүмкүн.

Грипп адатта 2-5 күнгө созулат, жалпы алсыроо жана жөтөл 2 жумага чейин сакталышы мүмкүн.

Көпчүлүк адамдар чындап эле суук тийгенде грипп менен ооруганын айтышат. Симптомдорду бири-биринен ажыратуу кыйын. Грипп менен ооруган адамдардын булчуңдары ооруп жана чыйрыгышы мүмкүн.

Грипптин татаалдашуулары

Грипп адатта, балдарда өтө жеңил өтөт, бирок оордошууларды пайда кылышы мүмкүн. Бул оордошуулар кээде абдан олуттуу болушу мүмкүн.

Грипптин эң көп таралган оордошуусу - бул пневмония. Пневмония менен ооруган бала начар көрүнөт жана адаттагыдан тезирээк жана катуураак дем алат болот.

Грипп ден соолугунда узак мөөнөттүү (өнөкөт) көйгөйлөрү бар балдарда олуттуу болушу мүмкүн.

Астма менен ооруган балдар үчүн грипп астманын оор пристубун пайда кылышы мүмкүн. 

Сиздин балаңыз грипп боюнча дарыгерге кайрылышы керекпи?

Сиз төмөнкү учурларда балаңызды дарыгерге алып барышыңыз керек:

• сиздин балаңыз суюктук ичпейт
• балаңыз тез -тез кусат
• балаңыздын абалы 48 сааттын ичинде жакшырбай жатат
• балаңыз өзүн абдан начар сезип жаткандыгына тынчсызданып жатасыз.

Тез жардам чакыруу же оорукананын тез жардам бөлүмүнө баруу керек, эгерде сиздин балаңыздын:

• башы катуу ооруса
• кубарса жана уйкусураса
• адаттагыдан дем алуусу тезирээк же кыйыныраак болсо.

Гриппти дарылоо

Көпчүлүк учурларда гриппке каршы атайын дарылоонун кереги жок.

Сиз гриппте жасай ала турган нерселер, бул симптомдорун дарылоо жана балаңыз үчүн шарттарды кыйла ыңгайлуу кылууга аракет кылуу:

• Балаңызга зарылчылыкка жараша сунушталган дозаларда парацетамол же ибупрофен бериңиз. Бул сиздин балаңыз ооруп жатса же калтыраса жардам бере алат.
• Балаңыз суусузданып калбашы үчүн суюктукту көп ичүүсүн колдоңуз. Жылуу суусундуктар тамак оорусун жана ооздун кургактыгын жеңилдетет.
• Балаңызга төшөктө жатуунун кереги жок. Балаңыз канчалык активдүү болгусу келгендигин өзү чечсин.
• Балаңызды тамактанууга мажбурлабаңыз. Ал, балким, ачка болбойт, бирок өзүн жакшы сезе баштаганда табити жакшырат.

Сиз качышыңыз керек:

• жөтөлгө каршы дары-дармектер - сиздин балаңыз былжырлуу суюктук көп болгондуктан жөтөлүп жатат, ал эми жөтөлгө каршы дарылар жардам бербейт
• шишикке каршы эритмелер жүрөктүн тез кагышы, калтыроо жана уйкусуздук сыяктуу терс таасирлерге ээ жана гриппте жардам бере албайт
• антибиотиктер – грипп вирустун кесепетинен пайда болот, андыктан антибиотиктер жардам бербейт, а гана эмес ашказан оорусуна жана ич өткөккө алып келиши мүмкүн.

Сүт азыктарынан алыс болуунун кажети жок - алар ашыкча былжырлуу суюктук чыгарбайт.

Балаңызга же өспүрүмгө аспирин же аспирин камтыган дары-дармектерди (ацетилсалицил кислотасы) бербеңиз. Аспирин балаңызды сейрек кездешүүчү, бирок өлүмгө алып келиши мүмкүн болгон Рейе синдромуна чалдыктырышы мүмкүн.

 Грипптин алдын алуу

Грипптен сактануунун эң жакшы жолу - колду дайыма самындуу суу менен жууп туруу. Ошондой эле колуңузду көзүңүздөн, мурдуңуздан жана оозуңуздан алыс кармаганга аракет кылыңыз.

Нымдуу тазалоо жүргүзүү, бөлмөлөрдү желдетүү.

Үй-бүлө мүчөлөрүн жөтөлгөндө оозун салфетка, жең же чыканак менен жабууга үндөңүз. Ошондой эле баардыгын тең жөтөлгөндөн жана чүчкүргөндөн кийин колдорун жууп турушун колдоңуз.

Балаңыздагы грипптин башка адамдарга жугуп калуу мүмкүнчүлүгүн азайтуу үчүн, ал ооруп жатканда мүмкүн болушунча айланадагылар менен байланышта болуусуна бөгөт коюңуз.

Иммундаштыруу

Гриппке каршы эмдөө коопсуз жана гриппке чалдыгуу ыктымалдыгын азайтат.

Кыргыз Республикасынын Билим берүү жана илим министрлиги менен ЮНИСЕФ  иштеп чыккан бала тарбиялоого жардам берген Bebbo мобилдик тиркемесинен ата-эне көптөгөн маалыматтарды таба алат.

Bebbo тиркемесин Play Market же App Store жүктөп алыңыз.