Айдоочу "төрөбө, төрөбө, мен корком" деп чуркап түшкөн. Маршруткадагы окуялар
Bilesinbi.kg окурмандары менен коомдук транспортто кандай күлкүлүү окуяларга туш болгону тууралуу сүйлөштү. Эгер сизде дагы эсиңизде калган позитивдүү окуя бар болсо, бизге жөнөтүңүз. Баса, баяндарды толугу менен бул жерден окуй аласыз.
Отурбаган эже
Бир эже жол киресин төлөбөй түшүп баратса, айдоочу “ай келин, акы бербейсиңби”,-дейт. Тиги эже камырабай “мен отурбай туруп келдим”,-деп түшүп кетти. Айдоочу эмне кыларын билбей нес болуп калды. Арт жакта боорубуз эзилди. zhaniinaz
Орустун башынан сылап
Эжем экөөбүз таң эрте жумушка маршрутка менен баратканда уктап барчумун. Бир маалда эжем мени ойготуп, “бас жетип калдык” дегенде уйкулуу көзүм менен шашып түшүп баратсам, маршрутка ордунан жылып кетти. Бир орусту чыканагым менен башына уруп алдым. Анысы аз келгенсип “ий, кечирип коюңузчу”,- деп башынан сылап коем. Түшүп алып ичибиз ооругуча күлгөнбүз. arykova.gulaiym
Эже же байке
Бир окуяны айтайын. Троллейбустан түшөйүн десем алдымда эже туруптур. Анан “эже түшөсүзбү” десем мени карады. Байке экен, чачын өстүрүп алыптыр. joldosh.89
Оонаган кыз
Мен автобуста туруп кетип бараткам. Автобус газды басса так ортосуна эл өтчү жерге отуруп калгам. Турайын десем турганга алым келбей, ары-бери оонагам. Анан бери жакта отурган эки бала келип эки жагыман көтөрүп тургузушкан. Түшүп алып кечке күлгөм. zhusupova7601
Окуучу жеңе
Чет өлкөдө жүргөн бир жеңебиз шашылыш көчөгө чыгыш керек болуп калып, кайын энесинин автобуста колдончу жол картасы менен кетип калыптыр. Анан аны кызматкерлер байкап калат. "Эмнеге мындай кыласың? Азыр штраф жазабыз!" десе, жеңебиз "Кечиргиле, мен мектеп окуучусумун, өзүмүн картамын акчасы түгөнүп калыптыр, ошого чоң энемин картасын алгам”,-деп ыйлаган экен. Жол акысы окуучу менен пенсионерлерге бир суммада имиш. Анан "ээ, арзыбаган тыйын үчүн окуучуну мынча кыйнадыңар, койгула кеч калбай кете берсин",- деп кетирип жиберишиптир. adilet.abylov_
Тарс!
Кечки маал болуп калган. Баары иштен мектептен кайта турган убак болчу. Жүргүнчүлөр автобуста бири-бирине жармашып келе жатышкан. Бир маалда кызыктай жыт “тарс” кеткен. Көпчүлүктүн ичинен билинбейт го, ким чыгарганы. Баары бири-бирине карап, терезелер ачылып, күлүп кеткенбиз. 1234_nonna
Кантип ыйлайбыз?
Женем экөөбүз шаарга барганбыз. Анан троллейбуска түштүк. Контроллер “оплачиваем” деп келе жатса, жеңем “эми кантип ыйлайбыз”,- деп боорду эзген. sbs_121212
Мен эмес куртка
Узун куртка кийип тыгын маршруткага чыктым. Куртканын асты жагында кнопкалары бар болчу. Шашылып бир-бирден ачпастан, баарын бир тарта койсом “тыыырт” деген катуу добуш чыгып кетсе болобу. Осуруп койгондой болду. Баары мени карайт же айта албайм. Уят болгом кыскасы. muratbekova060990
Берешен айдоочу
Студенттик кез. Акчам калбай калган. Окууга чейин жол узак эле. Макул маршруткага айтып түшүндүрүп түшүп кетем деп отуруп алдым. Бара турган жериме жеткенде, “байке акчам калбай калды” десем, ал мага кара үйүмө жетип алышымды айтып 10 сом берген. Аябай сүйүнгөм. Кийин кайтарайын десем ал кишини таппай койгом. Ушундай адамдар көп болсо экен. pe.ri495
Төрөбө!
Бир жолу боюмда барда маршруткага түштүм. Жакшы эле кетип бараткам. Бир маалда ичим түйүлүп кирди. Унчукпай отура бердим. Бир убакта ушунча катуу түйүлдү, “ой ичииим, байкеее” десем, токтотуп “төрөбө, төрөбө, мен корком, азыр таксистерди чакырайын”,-деп түшүп кетти. Бир маалда 3-4 таксисти чакырып келиптир. Алар келип мени карап турушат. Бирөөсү төрөтчүдөй болуп “кана эмне болуп жатасың” дейт. Мен болсо “айыма жетелекмин, азыр төрөбөйм”,- дейм. Ошентип таксиге салып жиберген. Ү йгө жеткиче ичим басылып калды. ali___asko
Башкы беттеги сүрөт интернеттен алынды.
Бул жерден башка кызыктуу макалаларды окусаңыз болот:
Биринчи сүйүүм мендей таппаганын айтып ыйлайт. Алгачкы сүйүү жөнүндө окуялар
"Лошади, бараны, коровы и маленькие коровы", деп айткам. Мигранттардын окуялары
Күйөөм сийип алыпмын деп шымын кайра-кайра жыттаган. Үй-бүлөлүк күлкүлүу окуялар
"Мугалимдер бизден кечирим сурагыла". Акыркы коңгуроодогу боор эзген окуялар