— Апа, үйлөнсөмбү дегем.
— Үйлөн, кой демек белем.
— Болочок келиниңиз менен таанышасызбы?
— Таанышканды кое турчу, кимди алсаң ошону ал, болгону тиги идиштериме колун тийгизбейм, тамакты өзүм жасайм.
— Келиниңиз эмне кылат анан?
— Билбейм, мен айтарымды айттым.
Кээ бирөөлөр “келин алсам, колум узарат” деп жыргашат. А менин апам, ашкананы өзүм тейлем дегени кызык.
Айзирек экөөбүз сүйлөшүп, ашыкча чачылбай эле коюну чечтик. Туугандарды чакырып бата алдык. Ошентип, бир заматта жаңы статуска ээ болдук. Апамдын талаптарын келинчегиме айткан эмесмин. Канча ирет батындым, бирок эрким жетпеди.
Алгачкы күндөрү апам тамакты өзү жасап, идиштерди өзү жууп жүрдү. Айзирек баарын байкап турду, бирок унчуккан жок.
— Апа, бул сонун бокал экен. Кайдан алдыңыз?
— Ыраматылык кайын атаң белек кылган.
— А бул чынынын сүрөттөрү абдан кооз экен.
— Ооба, мага да сүрөттөрү жагат.
Жумуштан келсем экөө идиштерди кармалап божурашып отуруптур. Апам эч кимге карматпаган идиштерин Айзирекке бергенине таң калдым. Унчукпай бөлмөмө кирип кеттим.
— Апа, тузун канча кошом.
— Бир кашык болот.
— Даамы баары бир сиздикиндей болбой жатат.
— Эч нерсе эмес.
— Сиз эле жасаңызчы.
— Жасай бер, ошентип акыры окшошот.
Билбейм кантип, бирок Айзирек апамды жибите алды. Азыр апам ашканага басып да барбайт. Баарын келинчегим өзү тейлейт. Идиштерди акырын коюп жатканын көргөн апам ыраазы боло жылмаят. Кээде өзү бул идиш кайда деп сурап калат. Бул учурда жубайым дароо издегенин таап берет.
— Апа, сизге эмне болду?
— Эмне болуптур?
— Позицияңыз өзгөрө түшкөнүн айтам да.
— Уулум, тиреше бергендин эмне пайдасы бар, келиним да бул үйдүн мүчөсү. Ал мага баалуу болгон нерселерге аяр мамиле жасай алаарын көрсөттү. Болгону ошол.
— Аялың акылдуу деңизчи.
— Башымды оорутпай, тур жумушуңду кылчы.
Бул жерден башка кызыктуу макалаларды окусаңыз болот:
Аялыма балдарга деп алимент берсем, өзүнө пальто сатып алыптыр
Туура эмес сүйлөп алып аялыман айрылдым
Кайын эжеме жоолук берсем, «муну өлгөнгө да алып барбайт» деп ыргытып салды
Келин алгандан бери 20 жашка жашарган кайын эненин сыры
Эт жеш үчүн барасың деп, күйөөм тойго жибербейт
Тойдон тайкем жилигин жоготуп алып ызы-чуу салды
Жүгүнгөндү жаман көргөн келиниме эч ким унчуга албайт
