Аскер болгум келет
Мен Бишкектеги Дайыр Асанов атындагы Мамлекеттик улуттук аскер лицейине тапшырайын дегем. Бирок 2018-жылы кабыл алуу болобу? Окуу жай жөнүндө дагы маалымат айта кетесиздерби?
Кыргыз Республикасынын Коргоо иштери
боюнча мамлекеттик комитетинин маалымат кызматы
Дайыр Асанов атындагы кыргыз Улуттук лицейинде 2017-18-жылдарда окуу процессин реформалоо белгиленгендиктен улуттук лицейге 2017-18-жылдарга лицейчилерди кабыл албоо чечими кабыл алынган. Былтыр кабыл алуу жүргүзүлөбү же жокпу азырынча белгисиз бойдон калууда.
Советтер Союзунун Баатыры генерал-майор Дайыр Асанов атындагы КУАЛ, өзүнүн уюштуруу-укуктук түзүлүшү боюнча негизги жана орто жалпы билим берүүнүн жалпы билим берүү программаларын ишке ашыруучу, орус тилин терең билүүгө, күчөтүлгөн аскердик-дене тарбиялык даярдыкка багытталган Кыргыз Республикасынын Коргоо министрлигинин мамлекеттик жалпы билим берүү мекемеси болуп саналат.
КУАЛда окутуу шарттары:
Окутуу 3 жылдык программа боюнча жүргүзүлөт (9, 10 жана 11-класстар).
Окутуу мезгилинде тарбиялануучулар толук мамлекеттик камсыздоодо болушат. Окуудагы эң жакшы көрсөткүчтөрү жана үлгүлүү тартиби үчүн Коргоо министринин атынан стипендия белгиленет, ал окуу жыл мезгилинде төлөнөт. Окуп жаткан тарбиялануучуларга жайкы жана кышкы каникулдар берилет.
КУАЛга өтүү шарттары:
КУАЛдын биринчи курсуна орто билим берүү мектебинин сегизинчи классын бүткөн уландар кабыл алынат.
Окутууга тандоо төмөнкү критерийлер боюнча жүргүзүлөт:
- тестирлөө, ал боюнча жалпы билим берүү дисциплиналары боюнча талапкерлердин билиминин деңгээли аныкталат;
- медициналык күбөлөндүрүү;
- дене тарбиялык даярдыгы.
КУАЛга өтүүнү каалаган талапкерлердин өздүк делолору жашаган жери боюнча аскер комиссариаттарында таризделет. Талапкерлердин бардык комплектелген өздүк делолору кабыл алуу комиссиясынын иши башталганга чейин КУАЛга аскер комиссариаттары тарабынан берилет. Өздүк делолор катталат, талапкерлердин фамилиялары талапкерлердин тизмесине киргизилет.