Өзүмдү эч кимге кереги жок буюмдай сезем
Bilesinbi.kg сайты сиздин каттарыңызга кесипкөй психологдордон жооп алып берет. Анонимдүүлүккө кепилдик беребиз.
Саламатсызбы. Мен 17 жаштамын. 3 бир тууганмын. Атам, апам бар. Учурда 10-класста окуйм. Акыркы учурда менин өзүмө болгон ишеним жоголуп бараткандай сезилет. Эч кимге кереги жок буюмдаймын. Эч нерсе жакпайт, эч нерсеге кызыкпайм, сабагымды да окугум келбейт. Кичинекей инимди айыбы жок болсо деле урушуп салам. Таш боор болуп баратам. Ата-энемдин урушканын көрүп жиним келет, кыйналгандарын көрүп кайра боорум ооруйт.
Мурун мындай эмес элем. Аябай сүйлөөк, тамашакөй болчумун. Адамдар менен дароо тил табышып кетчүмүн. Эмне болуп жатканымды билбейм. Музыка уксам гана кичине эс ала түшөм. Кыялдын дүйнөсүндө жашайм.
Мага жардам бериңизчи, мен өзгөргүм келет.
“Psihoanaliz.kg” психоанализ борборунун психотерапевти
Урматтуу окурман!
Сенин катыңды окуп, кандай сезимдерге туш болуп жатканыңды жакшы түшүнө алган жокмун. Балким, сенин жашооңдо бир нерсе болгондур, ошондон улам сенин мүнөзүң өзгөрүп жаткандыр.
Эгер мурда шайыр, башкалар менен тез тил табыша билген адам болуп жүрүп, эми 100 пайыз өзгөргөнүңдө кандайдыр бир олуттуу себеп бардыр? Же кимдир бирөөдөн көңүлүң калган. Сен ошол адамга өз таарынычыңды ачык айта албай, бей күнөө адамдардан (мисалы кичинекей иниңен) ачууңду чыгарып жатасың. Жакшылап ойлонуп көрчү? Сен чынында кимге жиниң келип жатат? Ким сени таарынтты?
Эгер ойлонуп көрүп түшүнсөң, дароо жеңилдей түшөсүң. Ал эми ойлоруң чаташып, ички дүйнөңдү аңдай албай жатсаң - күндөлүк жаз. Ал жака өзүңдүн ой-толгоолоруңду, сезимдериңди жазып, өзүң менен өзүң сүйлөшүп, башаламан ойлоруңду ирээтке келтирип аласың.
Балким сен өзүңдүн кыялыңдагыдай адам боло албайм деп чоочулап, бардык нерседен баш тартууну оңой жолу катары көрүп жаткандырсың. Ошого өзүңө жиниң келип жатат. Ошон үчүн эч ким менен сүйлөшкүң келбейт.
Жакын курбуңа же тууганыңа ички сезимдериң тууралуу айтып бер. Алардан кеңеш сура, колдоосуна муктаж экениңди айт, жакындарыңдын жардамынан баш тартпа.
Музыка укканың жакшы, музыка жан дүйнөнү тазартат, дарылайт. Бирок, реалдуулуктан качып кете албайсың.
Ачууланганың, ыйлаганың, кайдыгер болгонуң - бул нормалдуу көрүнүш. Сен тирүү жансың, сенде түрдүү сезимдер болот. Болгону ошол эмоцияларды башкарууга үйрөнүү зарыл.
Анан албетте, өзүңдүн милдеттериң тууралуу унутпа. Булар: окуу, кичүүлөргө кам көрүү, улууларга жардам берүү.
Мүмкүнчүлүгүң болсо психологго кайрыл. Ал сага жардам берет.