Мен иштебей окугум келет, атамдын жумуш издейин деген оюу жок. Эмне кылам?
Акыркы алты жылдан бери ата-энемдин иштери жүрүшпөй, жоктун айынан көп урушуп, эки-үч жыл ажырашып, чогуу жашабай да жүрүштү. Үй-бүлөдө эки кыз болчубуз, эки жыл мурун, апам менен атам кайра табышып, апам уул төрөдү. Мен тогузунчу классты бүтүп, окуган жокмун. Ата-энемдин кыйналганын көрүп жардам бергим келди. Так бир жыл тигүүчү болуп иштедим. Тапкан акчам атамдын айлыгынан көбүрөөк болчу. Апам үйдө бала карап, сиңдим мектепте окуп, атам таң аткандан түшкө чейин жумушта болуп, түштөн кийин үйдө уктайт.
Мен башка шаарда иштеп жүрдүм. Бирок бир жылдан кийин мени апам чакыртып, "жаныбызда эле болгонуң жакшы, иштебей эле кой, бул жактан деле эптейбиз" деп, базарга чыгып алды. Мен келгенде, атам иштебей эле үйдө жаткан экен. Азыр апам менен базарда иштеп, жардам берип жүрөм. Атам үйдө бала карайт, беш убак намаз окуган адам болуп, ар намазын мечитте окуйт. Мен ал убакта үйгө келип, бөбөгүмдү карап турам. Сиңдим таенемдин үйүндө жашайт. Атамдын жумуш караштырып, иштейин деген ою да жок. Базарда соода кээде болуп калат, кээде болбойт экен, тапкан акчанын 20% гана пайда.
Мектепте ар дайым биринчи болуп, алдыңкы окуучу элем. Аябай окугум келет. Окубай калдым, жок дегенде курстарга жазылып, тил үйрөнөйүн десем, ата-энем каршы болуп, каражатыбыз жок деп коюшту. Мектептеги мугалимдерим, классташтарым "Сен кайсыл жерде окуп жатасын? Эмне үчүн бизден кетип калдың?" деген суроону көп беришет, мен абдан намыстанам. Жаңы тааныш пайда болсо да, канча жаштамын, кайсыл жерде окуганым кызык болот экен. Эмне деп жооп береримди да билбейм. Кыйналып кеттим. Эмне кылсам болот?
Карлыгаш Акимкулова, "Психоанализ.кг" психотерапия борборунун психотерапевти
Урматтуу окурман!
Үй бүлөдө түшүнбөстүктөр болгону абдан оор. Ата-энелер балдарын камсыздай албаганы да кейиштүү. Сиңдиңдин таенең менен турганы кысталыш турмуштан улам болсо керек. Чоңдор өздөрүнүн мамилелерин жана үй бүлөлүк жашоосун бир нукка келтире албаганы үчүн сен күнөөлүү эмессиң. Учурда апаңдын жалгыз ишенген адамы сен окшойсуң.
Сенин айткандарыңа караганда атаңа нааразы болуп турасың. Колунан эч нерсе келбейт, үй бүлөнү бакпайт, анын айынан жаштайыман иштегенге аргасызмын деп жатсаң керек. Тогузунчу класстан кийин тапкан каражатың да аныкынан көп болчу дедиң. Бирок, кандай болгондо да ал сенин атаң. Атаң сенин жаралышыңа себепкер. Ошон үчүн эле сен аны сыйлаганга милдеттүүсүң.
Апаң менен атаң кайрадан бирге түтүн булатууну чечиптир. Демек, алар үй бүлөнү сактап калууга аракет кылып жатышат. Сен алардын чечимин сыйлап, кабыл алышың керек.
Ал эми билим алууга умтулганың мактоого татыктуу. Сен аябай акылдуу, эрктүү, максатына жете билген кыз окшойсуң. Сенде бардыгы жакшы болот. Жаш болуп турсаң да тиккенди билет экенсиң, соода кылганды, бала бакканды. Мунун бардыгы келечекте сага пайдасын тийгизет. Азырынча апаңа жардам бер. Ата-энең менен көбүрөөк сүйлөш, сырдаш бол. Келечектеги пландарың тууралуу айтып бер. Сен билим алуунун жана мыкты адис болуунун жолун таап кетесиң, мен сага ишенем.