Жакын мамиле кургум келбейт. Эмне кылсам болот?
Жашым 18де. Бир жыл мурун сүйлөшкөн кызым менен урушуп кеткем, күнөө менде. Ошол күндөн баштап аны унута албайм. Башкалар менен мамиле түзгүм, тааныш досторум менен сүйлөшкүм келбейт, жөн гана жалгыз жүрсөм дейм. Эмне кылсам болот?
Бермет Наралиева
психолог
Сен сүйлөшкөн кызың менен урушуп кеткениңе өзүңдү күнөөлөп жатканың бул жакшы касиет. Көпчүлүк адамдар өзүндө болгон жол болбостуктун себептерине бирөөлөрдү, жадакалса бүт ааламды күнөөлөшөт. Өзүңдүн кемчиликтериңди баалап аны кийин кетирбөөгө аракет жасайсың. 18 жаш куракта мындай жеңил сезимдер көп эле болуп турат. Эң негизгиси сен үй-бүлө күтүп же балалуу болгондо урушуп эки тарапка басып кеткен жоксуң да.
Эгерде сен ал кызды унута албай алиге чейин кыйналып жүрсөң, башкалар менен мамиле түзгүң келбесе. Сен өзүңдүн үстүңдөн иштеп, окуп билим алып, ийгиликтерди жаратып, өзүңдү дагы бир жакшы жактарың менен далилдеп көр. Андан кийин жасаган иштериңе чын дилден капа боло турганыңды айтып кечирим сураганга аракет кыл. Кечирим суроо эр адамдын иши.
Бир өзгөрүү болот деп ишенем. Сен өзүңдүн кемчиликтериңди аңдап тааный алган соң, аны өзгөртө да аласың. Эгер анда да өзгөрүү болбосо убакыт баарын өз оордуна коёт, көңүл ооруңду дарылайт.