Төрөгөндөн бери баламды өзүм карайм. Күйөөмдү аталык укуктан ажыратсам болобу?
Мен жалгыз бой эне болчум. Жолдошумду сотко бергем. Баламын аталыгы аныкталган. Жолдошум алиментке кесилген. Баламын метиркасында "отчествосу" жок, жаңы метирка албай эле жүрө берсек болобу? Алимент жокко чыгып калбайбы? Чет жакка чыгыш үчүн тоскоолдук жаратабы? Алимент төлөбөйт, кабар да албайт. Төрөгөндөн бери өзүм камсыздайм. Аталык укуктан ажыратсам болобу?
Жаңыл Алымкул кызы
Юрист
Саламатсызбы!
Мыйзамда соттун чечими чыккандан кийин канча убакытта туулгандыгы тууралуу күбөлүктү өзгөртүү керектиги тууралуу так маалымат жок. Бирок, мыйзым боюнча бир адамда бир эле туулгандыгы тууралуу күбөлүгү болуш керек.
Документтерде тактык болушу үчүн эртеби, кечпи алмаштырышыңыз керек болот.
Алмаштырылган күбөлүктү алып барбасаңыз, чогулган алиментти алууда көйгөй жаралат.
Аталык укуктан ажыратыш үчүн КРнын Үй-бүлө кодексинин 74-беренесинде көрсөтүлгөн себептер далили менен болуусу керек. Сиздин жагдайда көп жылдан бери алимент төлөбөй, баланы карабай, тарбиялоого салым кошпой, баланын жашоосунда такыр жок экенин негиз кылып сотко кайрылсаңыз болот.
Юрист Жаңыл Алымкул кызы менен инстаграмдагы @lawyer.janelle баракчасы аркылуу байланышсаңыз болот.