Аборт жасаткандар эки ай орозо кармаса күнөөсү кечирилеби?
Саламатсызбы! Мен ден соолугума байланыштуу жакында медициналык аборт жасатам. Дарыгер төрөй албайсың деп жатат. Интернеттен карасам бойдон алдыруу күнөө, бирок эки ай орозо кармап же болбосо 120 грамм алтындын баасын бир туугандарга төлөп берүү керек экени тууралуу жазылыптыр. Ошентсем күнөөм кечирилеби?
Кадыр Маликов
Теолог
Шариятка ылайык дарыгер тезинен медициналык аборт жасоо керек, болбосо аялдын ден соолугуна коркунуч бар деп айтса, эненин ден соолугун жана өмүрүн сактап калуу максатында аборт жасоого уруксат берилет. Ошондой эле, аборт акыркы айларда эмес, белгилүү бир убакытта жасалат. Аялда таптакыр күнөө жок. Себеби сиз ден соолугуңду сактап калуу максатында аборт жасоого мажбур болуп жатасыз.
Бул жерде эненин же баланын өмүрүн сактоо деген тандоо бар. Шариятыбыз эненин өмүрүн сактап калууга артыкчылык берет. Демек, аборт кандай гана болбосун айласыздан энени сактап калуу максатында жасала турган болсо, аял жоопкерчилик тартпайт. Эң негизгси аял бала төрөгүсү келген, бирок дарыгерлер кош бойлуулуктун белгилүү бир айында эненин өмүрүндө коркунуч бар экенин билишти. Аны сактап калуу максатында аборт жасоо керек экенин айтышса, мындай учурда аял күнөөкөр болбойт. Бир же эки ай катары менен орозо кармап кереги жок, шариятта мындай нерсе айтылган эмес.
Кабатыр болбоңуз, сиз кабылган жагдай бир сыноо болуп эсептелет, дарыгерлер эне боло албайсыз деп айткан күндө деле, кудай кааласа сизге бала берет. Ошондуктан дуба кылып, кийин көп балалуу болушту сураныңыз. Садака берсеңиз болот, орозо кармап, алтындын баасы менен белгилүү бир өлчөмдө акча берүүнүн кереги жок. Дагы айтам, эч кандай күнөөкөр болбойсуз.
Аял күнөөлүү болот, эгер ал балалуу болууну каалабай, абортту өз каалоосу менен жасаса.Себеби, исламда эненин өмүрүн жана ден соолугун сактап калуудан тышкары, аборт жасоого тыюу салынган.