11-жыл көзүмө чөп салган күйөөм менен ажырашсам стресс болбоймбу?
Саламатсызбы! Мен деле адам катары суроо берейинчи, чарчап кеттим. Жолдошум бар, балдарым бар. Балдарым үчүн деп жашаганыма 11 жыл болду. Жакшы көрүп турмуш курганбыз. Анан эле үйлөнгөн соң күйөөмдүн сол тарапка басканы башталды. Айыл-апага, тууган-урукка чейин билинип уят болдум. Бирок өзү такыр эле тыйылбады. Чарчап кеттим. Акыркы убакта өзүм үчүн жашоом керек экенин түшүнүп турам. Ажырашкандан кийин психикалык стресске түшүп калбаймбы деп коркуп турам. Психологдон кеңеш алып берсеңер сураныч?.
Зарина Усупова
Психолог
Саламатсызбы! Сиз чарчадым деп жатасыз, 11-жыл бул көзгө чөп салганын токтотпой, айыл-апага уят болгонуңуз, ага чыдап балдарым үчүн жашадым дегенибиз абдан өкүндүргөн көрүнүш.
Эне бактылуу болгондо гана балдар бактылуу болорун эсиңизге салгым келет.
Адам өзүн сүйбөгөндөн, өзүн төмөн баалоодон, жашоосунда көп кыйынчылыкка дуушар болот.
Ажырашсам кандай болот, деп өзүңүздү азыртадан коркутуп, стресске түшүп калбаймынбы деген сурооңузга жооп катары айтарым, сиз бул убакытка чейин деле стрессте жүрдүңүз. Сиз стресстен эмес, балким башкасынан коркуп жаткандайсыз. Өзүңүзгө суроо салып тереңинен карап көрүңүз.
Өзүңүз үчүн жашайм деп чечкениңизге абдан кубанып жатам. Өзүңүздү сүйгөндө гана жакын адамдарыңыз дагы сизди сыйлап, баалап, сүйөөрүн билесиз.
Зарина Усупова менен инстаграмдагы @zarina.psiholog аккаунту аркылуу байланышсаңыз болот.