Жолдошум баарын апасына айтат. Эми өз алдынча чечкиндүү боло алабы?
Саламатсызбы! Жолдошум экөөбүздүн турмуш курганыбызга 4 жыл болду. Ортодо бир балабыз бар. Ишенесизби баарынан чарчадым. Төрт жылдын ичинде ойлонуп атып каарый түштүм. Ичимдеги сырымды айта турган ата-энем каза болуп калышкан.
Менин маселем апам (кайненем). Өзүмдүн апам жок болгондугуна байланыштуубу айтор апамдын көзүн карап айланчыктап турам. Болгон сырымды айтып. Казан аяк кагышпай койбойт. Кичине урушуп кетсек эле апам келип баласына болушат. Менин жалгыз балам. Баламдын мээсин жеп бүттүң, баары сенден көз каранды деп.
Ар бир майда-чүйдө урушубузга кийлигишет. Жолдошум дагы атасы жок өскөнгөбү баарын апама айта берет. Өзү чечкиндүү болуп көнөбү же өмүр бою баарын апасына айтып көнүп калдыбы? Эмне кылсам болот?
Кээде ушундай жашоодон тажап өлгүм келет. Баламды ойлоп, ыйлап кала берем.
Айдана Мадишова
Психолог
Саламатсызбы окурман!
Катыңызды окуп, үй-бүлөңүздөгү ролдордун туура эмес бөлүшүлгөндүгүн байкадым. Үй-бүлө бактылуу болуусу үчүн анын ар бир мүчөсү өз ролун туура, так аткаруусу зарыл.
Мисалы, жолдошуңуз жетилген, үй-бүлөнүн оорчулугун көтөргөн, чечкиндүү болгондун ордуна, жашы жете элек баладай кыйынчылык болсо эле апасына барып арызданганы. Бул жолдошуңуздун жоопкерчиликсиз экендигинен кабар берет.
Албетте кыйын күндө ата-энеден кеңеш суроо жакшы нерсе, бирок үй-бүлөлү чырды апасына айтуусу анын психологиялык жактан жашы жете элек бала экендигинен кабар берет.
Ал эми апаңыз өзүнчө түтүн булатып, көйгөлөрдү өзүңөргө чечтирбей жаткандай. Жолдошуңуз жана балаңыз менен бир үй-бүлө экендигин кабыл алгысы келбей жаткан сыяктуу.
Тилекке карышы мындай учурда көйгөйдү жалгыз чечүү мүмкүн эмес. Жолдошуңуз жана апаңыз да өзгөрүүгө аракет кылуусу керек. Мүмкүнчүлүк болсо үй-бүлөлү психологго баарыңар тең барып, үй-бүлөдө ким кандай ролуду ойношу керектигин чечип алыңыздар.
Сизге үй-бүлөлүк бакыт каалайм!
Психолог Айдана Мадишова менен @insight.aidana баракчасы аркылуу байланышсаңыз болот.