Кайын энеме катталган үйдү өзүмө кантип өткөрсөм болот?
Саламатсызбы! Менин күйөөм өтүп кеткен. Үч балам бар, кайын энем менен турам. Үй кайын энеме катталган. "Өлсөм силерге калат" дейт. Бирок документти өзүмө кантип өткөрсөм болот?
Жаңыл Алымкул кызы
Юрист
Саламатсызбы!
Сурооңузда тактоо керек болгон жагдайлар бар.
1) Кайын энеңиздин жолдошунун (кайын атаңыздын) көзү тирүүбү?
2) Башка балдары барбы?
Анткени, эгер кайын энеңиз каза болуп калчу болсо, анын атындагы үй КРнын Жарандык кодексинин 1142-беренесине ылайык мурас түрүндө анын жолдошуна, жана балдарына өтөт. Себеби, алар мыйзам боюнча биринчи кезектеги мураскорлор болуп саналат. Бул жагдайда үй мурас катары сизге, же сиздин балдарыңызга өтпөйт.
А эгерде анын сиздин жолдошуңуздан башка балдары да, кайын атаңыз да жок болсо, анда мурас КР Жарандык кодексининин 1143-беренесине ылайык экинчи кезектеги мураскорлор катары анын бир туугандарына өтүш керек болот.
Андыктан, үйдү сөзсүз сиздин атыңызга каттатыш керек болсо, анда мындай кылсаңар болот:
Кайын энеңиз "тартуулоо" келишими менен, же керез ирээтинде сизге
өткөрүп берип койсо болот.
Юрист Жаңыл Алымкул кызы менен инстаграмдагы @lawyer.janelle баракчасы аркылуу байланышсаңыз болот.