Балдарымдын ыйынан, көр тириликтен тажадым. Эмне кылсам болот?
Саламатсызбы! Эки балам бар, кичүүсү 9 айлык. Зериктим. Алыс жактарга кетким келет. Балам ыйлаак. Түндөсү да тынч уктабайт. Майда жумушдарды тынч кыла албайм. Кайын эне, кайын ата жок. Айылда турабыз. Жолдошум жакшы адам. Бирок мени түшүнбөйт. Күндөгү тиричилик, окшош күндөр. Жашаганыбызга 6 жыл болуп жатат. Белек беришти, көңүл көтөрүштү, кино, ресторан дегенди түшүнбөйт же акча короткусу келбейби билбейм. Мен өзүмдү алаксыткым келет. Бир айда бир жолу болсо да көр тириликти унутуп жакшы жерлерге барып, жолдошум балдарым болуп эс алгым келет. Айтсам түшүнбөйт. Жолдошумдун ою акча кетет. Акыркы убакта өзүмдү таштап салдым. Балдардын ыйлаганы, шоктонгону, баарын таштап качып кетсем дейм.
Асель Баимбетова
Психолог
Кутмандуу күнүңүз менен!
Алгач эс алышыңыз керек. Кыязы, сиз кичинекей баланын ыйынан тажаган окшойсуз. Демек, эң биринчиден жакшылап уктап, эс алуу зарыл. Андан кийин гана эмне кылуу керек деген варианттарды издеңиз. Анткени чарчаган абалда жашоодон эмнени каалап жатканыңызды түшүнүү абдан кыйын болот.
Мүмкүн болсо, үйүңүзгө барыңыз, ата-энеңиз, бир туугандарыңыз жардам берсе, кичине уктап, өзүңүзгө келип аласыз. Оюңузду топтоп, анан жашооңузду өзгөртүүгө киришесиз.
Психолог Асель Баимбетова менен инстаграмдагы @psihologiya_kg баракчасы аркылуу байланышсаңыз болот.