Күйөөм эки кызына 3800 сом алимент төлөйт. Кантип көбөйтсөм болот?
Саламатсызбы! Мүмкүн болсо мага консультация алып берип кое аласызбы. Мен күйөөм менен ажырашкам. Ал мени таштап, Москвадан үйлөнүп алган. Анан 6 жылдан бери эки кызга 3800 сом алимент төлөйт. Ажырашканымдан бери ошол алименттен башка эч жардам бербей келет. Кыздарынан да эч кабар албайт. Азыр эки кызым окуп калган. Бала чоңойгон сайын чоң акча кетет экен. Ошого алиментти көбөйтүүгө болобу?
Жаңыл Алымкул кызы
Юрист
Саламатсызбы! Ооба, болот. КРнын Үй-бүлө кодексинин 124-беренесине ылайык алименттин өлчөмүн өзгөртүү тууралуу арыз менен сотко кайрылууга укуктуусуз.
Сот тараптардын кайрылуусу боюнча алардын материалдык, үй-бүлөлүк, ден-соолук жана башка абалдарынын өзгөргөнүн эсепке алып, алименттин суммасын көбөйтүп, же азайтат.
Негизи мыйзам боюнча 2 балага бардык тапкан кирешесинин 1/3 бөлүгү төлөнөт.
Сиз болсо 6 жылдан бери 3800 сом алат экенсиз.
Андыктан, бул жерде такташ керек болгон жагдайлар бар.
1) 3800 сом деп туруктуу акчалай суммада өндүрдүңүз беле?
2) А эгер туруктуу эмес 1/3 деген өлчөмдө өндүртүп, анан бул башында 3800 сомду түзгөн болсо 6 жыл ичинде айлыктын өзгөргөнүнө жараша бул сумма да көтөрүлүшү керек эле.
Ушул экинчи моментти сот аткаруучуңуз менен байланышып, маселе катары көтөрүңүз.
Юрист Жаңыл Алымкул кызы менен инстаграмдагы @lawyer.janelle баракчасы аркылуу байланышсаңыз болот.