Көшөгөдөгү ыйлаган кыздан 26 жыл мурунку өзүмдү көрдүм

2021.08.19, 17:36
5459

Bilesinbi.kg окурмандарынын баштан өткөргөн ар түрдүү окуялары менен бөлүшүп келет. Бул ирет окурманыбыздын катын жарыялайбыз. Эгер сизде дагы кызыктуу баян бар болсо, бизге жөнөтүңүз.

Жолдошум ала качып алган. Көшөгөдө олтуруп алып машинага салып берген жеңемди каргап ыйлагам. Аялдар, “биз да ушинтип келгенбиз, таш түшкөн жериң оор, отурган кыз ордун табат, Жоки жаман бала эмес”, деп сүйлөнүшкөн. 

Башында көнө албай абдан кыйналдым. Өзүм бар турмушта чоңойгонгобу, жолдошумдун жашоосу жаккан жок. Ал учурда “ажырашты, олтурбай келип алыптыр” деген сөздөр аябай уят эле. 

Бир айдан кийин кош бойлуу болдум. Жолдошум өктөм сүйлөп, кайын энем болбогон нерсе үчүн тилдей баштады. Кайын атам эле, келин бала олтур, эс ал, дагы ич тамактан деп турчу. Бирок биринчи баламды төрөөргө аз калганда көзү өтүп кетти. 

Жолдошум кызыл камчы болуп чыкты. Ажырашам болуп турганда боюмда болуп калыптыр. Кыздуу болдум. Тагдырыма моюн сунуп, көргөн кордугума көз жумуп жашай бердим. 

Азыркы жашоом кудайга шүгүр. Балдарым эр жетти, келиндүү, неберелүү болдум. Келиниме ашыкча сөз сүйлөп, заарымды чачпайм. Жолдошум он беш жыл мурун эс тутумун жоготуп койгон. Көргөзгөн кордугуна карабай багып келем. 

Жакында эле кошунамдын баласы үйлөнөт болуп жардамдашып калдык. Аңгыча эле келин келди, олтургузушуп койгула деп калышты. Кошуна аялдар менен аралашып көшөгө тарапка бардым. Кыз олтурбайм, менин жигитим бар деп ыйлап жатыптыр. Жүрөгүм токтоп калайын деди, өзүмдүн жаш кезимди, кызымды элестеттим. 

- Сүйлөшүп эле алып келе жатат дешти беле? 

- Ооба. Эмнеге обу жоктонуп жатат бу кыз?

- Ыйлап жатканына караганда баса калып эле алып келе берген окшойт. Мен катышпайм, жүрөгүм чыдабайт. 

Кыйын кыз экен, айтканынан кайтпай, ала качуунун курмандыгы болбой кетип калыптыр. 21-кылымда жакшынакай таанышып, сүйлөшүп, бири-бириңди түшүнүп баш кошсо болот да. Кыздарга айтаарым эч качан мындай жапайычылыкка моюн сунбагыла. 

Бул менин кайын энемди окуясы. Жашоосу жөнүндө көп айтат, кеңешин берет. Кошунабыз тууралуу жакында эле чалып айтып берген. Апамдын көзү муңдуу болуп турат. Дайыма биздин жана кайын сиңдимдин бактысын тилейт. Апа оорубаңыз, биз сизди жакшы көрөбүз.

Бул сайтка чыккан маалыматтын бардыгы Bilesinbi.kg сайтынын менчиги болуп саналат. Сайтка чыккан маалыматты гиппер шилтемесиз колдонууга тыюу салынат.
Анонимдүү колдонуучунун суроосу модератор текшергенден кийин гана сайтка жайгаштырылат. Эгер сиздин сурооңуз тез жайгашсын десеңиз анда биздин социалдык түйүндөрдүн бирине катталыңыз.
Ɵзүн туура алып жүрүү
биздин сайтта:
сөгүнгөн сөздөрдү жазганга болбойт
суроолорду ким жазса, ага карата мазактаган, шылдыңдаган сөздөрдү жазууга болбой
кимдир бирөөлөрдү коркутуп үркүтүү, же жекеме-жеке сүйлөшүүгө чакырууга болбойт
дискусиянын катышуучуларынын кадыр баркына шек келтирүүгө, басынтууга болбойт
КР нын мыйзамына каршы келген жоопторду чыгарууга болбойт
жоопторду транслитке чыгарууга болбойт
жоопторду башкы тамгалар менен бөлүп чыгарууга болбойт
адамдардын тутунган динине, улутуна асылган, басынткан сөздөрдү жазып чыгарууга болбойт
бир эле суроого ар кайсы ник менен жазууга болбойт
ник менен сөгүнүп сагынган сөздөрдү жазууга болбойт
суроого тиешеси жок жоопторду жазууга болбойт