Күйөөм балалуу болбой туралы деп жыныстык катнашты үзгүлтүккө учуратып жатат
Саламатсызбы! Мага психологдон кеңеши керек болуп жатты эле. 25 жаштамын. Турмушка чыкканыма беш ай болду. Күйөөм үй-жай кылгыча 2-3 жыл балалуу болбой туралы деп, уругун ичиме түшүрбөй жатат. Мен балалуу болгум келет. Эмне кылсам болот?
Асель Баимбетова
Психолог
Кутмандуу күнүңүз менен!
Сурооңузда бир катар маселелер түшүнүксүз калган. Мисалы, күйөөңүз колуңузду сурап жатканда, эки-үч жыл балалуу болгусу келбегенин айтты беле? Кандай болгон күндө дагы силер бой жеткен адамсыңар, ачык отуруп сүйлөшүп, бир пикирге келсеңер болот.
Ал эми балалуу болгуңуз келип жатканың боюнча жооп бере кетсем. Тилекке каршы, үзгүлтүккө учураган жыныстык катнаш ишенимдүү каражат болуп бере албайт. Каалаган учурда бойго бүтүп калышы мүмкүн, бул бир гана убакыт маселеси. Тынчсызданбай эле коюңуз жана ыңгайлуу шарттарда боюңузга бүтөт. Эгерде кош бойлуулук 1,5-2 жылдын ичинде болбосо, анда гинекологго кайрылыңыз.
Сурооңузга толук жооп бериш үчүн бир канча жагдайларды тактоо зарыл. Психологго кайрылып кеңеш алып коюңуз.
Бактылуу болуңуз!
Психолог Асель Баимбетова менен инстаграмдагы @psihologiya_kg баракчасы аркылуу байланышсаңыз болот.