Кызыл китеби бар жериме иш козголуп жатат. Эмне кылам?
Саламатсызбы! 2014-жылы кызыл китеби бар жер сатып алганбыз. Эми ошол жерге шаардык сот тарабынан иш козголуп бизди сотко чакырып жатышат.
2004-жылы трансформациялоо болбой эле чекке берилген экен. Биз эмне кылышыбыз керек? Трансфармациялоонун айынан чекке берилген токтом, алуу-сатуулар жокко чыксын деп жатышат. Сөзсүз жооп алып бериңизчи, айылда 5-6 үйгө ушундай кат келди.
Нурислам Раимжанов
"Справедливость" укук коргоо уюмунун юристи
Урматтуу окурман, чындыгында мындай көрүнүштөр бар. Бул көйгөйлөрдү чечүү үчүн 2020-жылдын 13-ноябрында "Жер пайдалануу чөйрөсүндөгү айрым мыйзам актыларына ("Сугат айдоо жерлерин жарактуу жерлердин башка категорияларына жана түрлөрүнө которууга (трансформациялоого) мораторий киргизүү жөнүндө", "Жер участокторун которуу (трансформациялоо) жөнүндө" Кыргыз Республикасынын мыйзамдарына, Кыргыз Республикасынын Жазык кодексине) өзгөртүүлөрдү киргизүү тууралуу" мыйзам кабыл алынган.
Ал эми, бул мыйзамдын максаты айыл чарба өндүрүшүндө колдонууга жараксыз же жеке менчик укугунда мамлекеттик актыларга ээ болгон сугат айдоо жерлерин которууга (трансформациялоого) мүмкүнчүлүк берүү, болуп эсептелинет.
Демек, сиз соттук териштирүүлөргө ушул жаңы мыйзамдардын негизинде, сизге карата келтирилген доо арызга каршы пикир жазып кайрылууңуз керек болот.
Ийгилик!