Тамакты чалпылдатып жегендерди көрсөм ачуум келет. Эмне кылсам болот?
Саламатсызбы! Тамакты үн чыгарып, айталы чалпылдатып жегендерди көрсөм аябай ачуум келет. Капа болуп калбасын деп, өздөрүнө айта албайм. Аларга чыдап жүрө берип нерв жагынан оорулуу болуп кала турган болдум. Эмне кылсам болот?
Асель Суюнбаева
Психолог
Саламатсызбы! Менде дагы сиздикине окшош көйгөй бар эле. Бирок, мен отуруп алып, баарын анализдеп, көп ойлондум. Акыры мындай бир тыянак чыгардым: ошол кишинин өзүнө бир таарынычым бар болуп чыкты. Ал таарынычты айтып, чечишип, ачык сүйлөшүп алгандан кийин баары жайына келди. Көрсө, ага болгон таарынычым үчүн анын ар бир кыймыл-аракетин жактырбай баштапмын.
Эгерде бизди бир нерсе кыжырыбызды келтирип жатса, кеп башкаларда эмес, өзүбүздө экен. Ал кишини жакшы көрсөң, чалпылдатканына карабастан жага берет, туурабы?
Бул нерсе өтүп кетет, болгону анализ кылыш керек. Чалпылдатып ичкени бул көрүнүп турган нерсе, ал эми себеби ар жакта көрүнбөй турат. Чынында эмнеси мага жакпай жатат? Ошону ойлонуп көрсөңөр, башка жооп чыгат, анан таң каласыңар. Чынында мен башка нерсеге кыжырым келип жаткан турбайбы дегенди түшүнсөңөр, алдыга жылып жаткан болосуңар.