Күйөөдөн көңүлүм калды, ушуну ата-энеме кантип түшүндүрөм? Психологдун кеңеши
Саламатсыңарбы. Жашым 20да, турмушка чыгып, эки эле ай жашап, ажырашып келе бердим. Кош бойлуу элем, азыр кызыма алты ай болуп калды.
Айтайын дегеним, ата-энем кызыңды таштап, эртерээк турмушка чык, деп жатышат. А мен кызымды эч кимге калтыргым келбейт. Таап берген жигиттер такыр жакпай койду, кемчилигин издей берчү болдум.
Күйөөдөн көңүлүм калды, турмушка чыга турган оюм жок. Ата-энеме кантип түшүндүрөм? Эмне кылышым керек?
Камила Юсупова
Психолог
Берген сурооңузга өзүңүз эле жооп бердиңиз. Турмушка чыккыңыз келбейт, кызыңызды ата-энеңизге калтыргыңыз келбейт. Бул сиздин каалооңуз, сиздин чечимиңиз. Демек, кандай чечим кабыл алсаңыз да, ал туура чечим болуп саналат.
Турмушка чыккыңыз келбей турганы, түшүнүктүү жана мыйзам ченемдүү көрүнүш. Ажырашканыңызга аз эле убакыт өттү, өзүңүзгө келе элексиз, жараттарыңыз айыга элек.
Ата-энеңизди да түшүнүп турам, алар сизге бакыт каалап, тезирээк теңин таап, орун алып калсын, деп жатышат. Бирок, бул сиздин жашооңуз, ата-энеңиздики эмес. Ар ким өз тагдырын өзү чечүүгө милдеттүү.
Турмушка чыккым келбейт, кызымды өзүм карайм, деп так жана даана чечтиңиз. Эч ким сизди кыйнап күйөөгө берүүгө акысы жок. Болгону өзүңүздүн позицияңызды ата-энеңизге жеткирүүгө аракет кылыңыз. Менимче, аларга түшүндүрүп берүүнүн жолун табасыз.
Бактылуу болуңуз!
Психолог Камила Юсупованы инстаграмдагы @institute_auca_kg баракчасы аркылуу тапсаңыз болот.
Башкы беттеги сүрөт интернеттен алынган.