Өзүмдүн апам мага өгөй кызындай мамиле кылат, эмнеге мындай?
Менин апам, өзүмдүн эле энем, бирок, мага өгөй кызындай мамиле кылат. Байкем, инилеримдин алдында башкача сүйлөр, мага келгенде өзгөрөт. Басынтып, кагып-силке берет.
Мисалы мени жаман сөздөр менен урушуп жатканда атам кирип келсе “оку, оку деп жатам, жакшы болсун деп” – демиш болот, анан атам да ага кошулуп мени жемелейт.
Иштегим келет. Официант болуп жумушка орношуп, бир аз акча таап баштагам. Анда да урушуп жатып ишимен чыгарып алышкан.
Апама жеке сырларымды айтпайм, бир нерсе десем эле атама баарын жеткирип салат. Жиндерин менден чыгарышат. Эжем “өзүңдө да бар, тил кайтарсаң керек да” деп айтат. Чынында жөн сүйлөй албайм. Берген суроосуна гана жооп берем, андан аркысын сүйлөгүм келбейт.
Үйдо жалгыз кызмын. Эми жуучулар да келе башташты. Мен турмушка чыккым келбейт, 18ге эми гана чыктым.
Асель Баимбетова
Психолог
Үй-бүлөңүздө өзүңүздү ыңгайсыз сезгениңиз абдан кейиштүү. Менимче сиз башкача жашоону каалайсыз, бирок ата-энеңиз сизге уруксат бербей жатышат, иштеп өз алдынча болушуңузга да каршы экен.
Эжеңиз менен сырдаш болсоңуз анын пикирин угуп көрүңүз, сизге колдоо керек экенин айтыңыз. Эмнени туура эмес кылып жатканыңызды, ата-энеңиз менен пикири келишпестиктерде кайсы жеринен сизден ката кетип жатат, кызыгып сураңыз.
Ошондой эле курбуларыңыздын үй-бүлөлөрүндө абал кандай, ата-энеси менен мамилеси жакшыбы, пикир келишпестиктер болгондо алар эмне кылышат? Ушулар туурасында сурап көрүңүз. Бул сизге өзүңүздүн абалыңызды кененирээк түшүнүүгө жардам берет.
Азыркы тапта сиздин өспүрүм курагыңыз соңуна чыккан чак. Дагы деле гормондор толкуп, жалпы эмоционалдык абалыңызга өз таасирин тийгизип жатат. Мындайда адамдар кадимки көрүнүштү курчураак кабыл алышат. Жакындарыңыз менен көбүрөөк сүйлөшүңүз. Шартыңыз болсо психологго кайрылыңыз.
Ийгилик!
Психолог Асель Баимбетова менен инстаграмдагы @psihologiya_kg баракчасы аркылуу байланышсаңыз болот.
Башкы беттеги сүрөт интернеттен алынды.