Төшөккө заара кылып койгонумду билбей калам, күйөөмөн аябай уялам
Саламатсызбы. Суроомду чыгарып бериңизчи, сураныч. Суроом гинекологго: түнкүсүн заарамды кармай албай жатам. Эч жерим деле оорубайт, суюктук көп ичпейм. Уктап турсам эле төшөгүм суу болуп калган болот.
Учурда эки балам бар. Экинчисин төрөгөнүмө бир ай болду. Бирок бул көрүнүш турмушка чыккандан бери эле болуп жатат.
Кайын журт менен тургандыктан алардан, өзгөчө күйөөмөн аябай уялам. Үй-бүлөлүк дарыгерге көрүнгөм, ал дарыларды жазып берген, молдого да барып дем салдырып жүрдүм. Эч нерсе жардам берген жок.
Эмне кылам, кеңеш бергилечи?
Азат Бейшенов
“Кортекс” клиникасынын адиси, уролог
Саламатчылык. Бул суроо менен гинекологго эмес урологго кайрылуу керек. Сиздин ооруңуздун аталышы “стрессовое недержание мочи”. Көбүнчө улгайып калган аялдарда, жаңы төрөгөн келиндерде кездешет. Андан тышкары бул оору тукум куушу мүмкүн, салмагы ашыкча болгондо, эгиз же андан көп бала төрөгөндө, боюнда бар кезде баланын салмагы өтө чоң болгон учурларда да болушу мүмкүн. Кыскасы, бул көйгөйдөн бир да аял корголгон эмес.
Сиз консултацияга келиңиз. Текшерип, анализдердин жыйынтыгын көргөндөн кийин так себебин аныктай алабыз. Алгач дары-дармек менен дарылоону сунуштайбыз. Эгер ал да жардам бербесе анда операция жасатса болот.
Ал “слинговая операция” деп аталат. Анда заара каналынын ийкемдүүлүгүн чектөөчү нео-байламта орнотулат. Дарыгерлердин пикири боюнча операциянын эффективдүүлүгү 95%га тете.
Ден соолукта болуңуз.