Турмушка чыккам, кызыбыз бар. Бирок мен бир чоң ката кетирдим
Саламатсызбы. Мен 20 жаштамын. күйөөм мени менен он күн сүйлөшкөндөн кийин эле алып качкан. Элдин: “жакшы жигит” деген сөзүнө ишенип, отуруп кала бергем. Кыздуу болдук.
Бирок, мен бир чоң ката кетирдим. Мурда өзүм жактырып жүргөн бала менен кармалып калгам. Ошондон кийин күйөөм мага ишенбейт. Кызганычтын айынан көп урушабыз, кээде кол көтөрөт.
Күйөөгө тийгениме бир жыл болду. Мени алып качканда отуруп калганыма аябай өкүнөм.
Өкүнбөй кантип жашайм? Күйөөмдү кантип сүйөм?
Асель Баимтетова
Психолог
Саламатчылык. Түшүнгөнүмө караганда, сиздин үй-бүлө курууга берген макулдугуңуз жеке өзүңүз кабыл алган чечим болгон эмес. Сиз элдин сөзүнө ишенип “эл эмне дейт”, “уят” деген чектөөлөрдөн улам, калып калгансыз.
Бир жылдан кийин үй-бүлөлүк мамиледе кризис башталды. Бардыгын реалдуу көз караш менен карап, реалдуу кабыл ала баштадыңыз.
Мага, сиз өзүңүз эмнени каалап жатканыңызды билбей тургандай сезилип жатасыз. Жашоодо кандай максатыңыз бар? Күйөөңүздөн эмнени күтөсүз? Кандай болушун каалайсыз? Келечекте үй-бүлөм кандай болсо экен, деп кыялданасыз? Балким, ушул суроолорго жообуңуз жок болгондуктан, башка жигит менен да жолугушууга бардыңыз.
Сизге бере турган кеңешим, алгач жашооңузду талдап көрүңүз. Ушу күнгө чейин эмнелерге жетиштиңиз? Артыкчылыктары, кемчиликтери эмнеде? Ушундай турмушта өмүр бою жашоого макулсузбу? Балким, айрым көрүнүштөрдү өзгөрткүңүз келет? Келечекке кандай пландарыңыз бар?
Анан күйөөңүз менен ачык сүйлөшкөндү үйрөнүңүз. Оюңузду так, даана айтыңыз. Көпчүлүк пикирин нааразычылык, күнөөлө, салыштыруу аркылуу билдиришет. Бул туура эмес, позиция. Мындай тактика бир да көйгөйдү чечпейт. Тетирисинче, түшунбөстүктөрдү жаратат.
Шартыңыз болсо, психологго кайрылып көрүңүз. Ал өзүңүздү табууга жана түшүнүүгө жардам берет. Анын арты менен күйөөңүзгө болгон мамилеңиз өзгөрөт.
Психолог Асель Баимбетова менен инстаграмдагы @psihologiya_kg баракчасы аркылуу байланышсаңыз болот.
Башкы беттеги сүрөт интернеттен алынды.