Жакында турмушка чыгам, гинекологго көрүнүп койсомбу дегем, бирок корком
Саламатсызбы. Мен жакында турмушка чыгам. Гинекологго барып көрүнүп койсомбу дегем. Бирок, көбү гинеколог текшерип жатып кыздык белгиге зыян келтирип коюшу мүмкүн, деп айтышат. Ушундай болуусу мүмкүнбү?
Раушан Джумагулова
“Эркай” клиникасынын адиси, акушер-гинеколог
Бул суроого так жооп бере албайм. Бирок адискөй гинекологдор өспүрүм бейтаптарга абдан этият мамиле кылышат. Алардын организми жаш жана кандайдыр бир медициналык манипуляцияларга даяр эмес экенин эске алабыз.
Албетте, турмушка чыгаарда бир сыйра текшерүүдөн өтүп кою ашыктык болбойт. Өзүңүз жакшы тааныган жана тааныштар сунуштаган гинекологго кайрылыңыз.
Гинекологго келгенде, сөз башында эле кыз экениңизди эскертиңиз. Мындай учурда жыныс кынынын флорасын изилдөө үчүн гинекологиялык күзгү (гинекологическое зеркало) колдонулбайт. Зарылчылык болсо түз ичеги аркылуу көрөбүз же УЗИге жөнөтөбүз.
Ден соолукта болуңуз!
Башкы беттеги сүрөт интернеттен алынды.