Абысын менен кандай мамиледе болуш керек? Психолог жооп берет
Саламатсызбы. Абысын менен кандай мамиледе болуш керек? Менден улуу абысыным бар. Экөөбүздүн мүнөзүбүз, мамилебиз ар башка. Ал орой, өзүнүкүн такыр бербейт. Кичүү болгонум үчүн көп нерсесине көз жумуп, урушсак кайра жарашууну мен баштайм. Чыдап жүрө бергим келбейт. Эмне кылышым керек?
Виктория Исакова
Психолог
Кутман күн!
Тааныш эмес адамдар бир үй-бүлө болуп жашап баштаганда, мамиле куруп, баарлашууга аргасыз болушат. Албетте, мамиленин бир калыпка дароо түшүүсү оңой эмес.
Сиз ак-көңүл, кек сактабаган адам окшойсуз. Ар дайым биринчи кадам жасайсыз. Бул абдан жакшы сапат.
Ал эми сиздин абысыныңыз сизге чейин тажрыйба топтоп, өзүнүн мүнөзү калыптанып калган. Ал үчүн орой жүрүм-түрүм нормага айланса керек. Демек, сиз анын кыялын өзгөртө албайсыз.
Менин сизге бере турган кеңешим, мурункудай эле сүйлөшүп, баарлаша бериңиз, талаш темаларды талкуулабаңыз. Башкысы өзүңүздүн чек араңызды коргой билиңиз. Басынтып, кемсинтүүгө жол бербеңиз. Ортоңорго көрүнбөгөн дубал орнотуп алыңыз.
Абысыныңыз сүйлөбөсо таарынычтарын өзүнө калтырыңыз. Таарынгысы келгени үчүн ошол сезимди тандап алды. А сиз жеке жашооңузду, үй-бүлөңүздү, куруңуз. Өзүңүз менен өзүңүз гармонияда болуңуз.
Сизге бакыт каалайм!