Тестке ишенемби же УЗИгеби? Гинеколог жооп берет
Бир жумадан бери этек кирим кечигип жатат. Тест алып текшерсем, эки сызык чыкты. Эртеси УЗИге барып көрүнсөм “беременности нет” деп жазып берди. Бир жумадан кийин кайра келип көр дейт. Ошондо кимисине ишенем, тесткеби же УЗИгеби?
Машхура Ишмухамедова
Гинеколог
Тест тагыраак. Себеби тест заарадагы ХГЧнин деңгээлин аныктап, ал жогору болсо кош бойлуу экенин көрсөтөт. Үйдөн жасалган тесттер болжол менен кош бойлуулукту 8-9 күнүнөн тартып аныктайт, башкача айтканда этек киринин 1-2 күнгө кечиккен учурунан баштап.
Бирок, мындай тесттердин тактыгы көптөгөн факторлорго байланыштуу. Тесттин сапаты, тесттин өзүн туура жасоо ж.б.
Ал эми УЗИ мөөнөтү аз эле болгон түйүлдүктү көрсөтө албайт. Түйүлдүк чоңоюп кеминде 5-6 жума болгондон кийин көрсөтөт. Кийинки жумада дагы келип УЗИге түш дегени ошого байланшытуу.
Аман-эсен көз жарып алыңыз!
ХГЧ – адамдын хорионикалык гонадотропини (Хорионический гонадотропин человека): жумуртка уруктандырылгандан кийин хорион тканы иштеп чыккан гормон. Бул гормон кош бойлуулукту жана анын туура калыптанып жаткандыгын көрсөтөт.
Кош бойлуу аялдын ХГЧ деңгээлинин түшүп кетиши жатындан сырткары бойго бүтүп (внематочная беременность) калганды же бойдон түшүп калганды (выкидыш) билдирет.