Үй шартында ырдаганды үйрөнө аламбы? Эксперт жооп берет
Саламатсызбы. Мен ырдагым келет. Үй шартында кайсы көнүгүүлөрдү жасап, үнүмдү ачсам болот?
Джамиля Муратова
Ырчы, вокалист
Мен үй шартында ырдап, үйрөнүүгө такыр каршымын. Бул диагнозду билбей туруп үй шартында дарылоого тете.
Музыка бул илим. Сиздин үнүңүздүн мүмкүнчүлүктөрү кандай? Жашыңыз канчада? Эркексизби айымсызбы? Мунун бардыгы роль ойнойт. Вокал сабагында ар бир окучууга индивидуалдуу мамиле жасалат. Ар бирине тиешелүү көнүгүүлөр тандалып, тапшырмалар берилет.
Көпчүлүгү өз алдынча ырдаганды үйрөнүп, көнүп калышат. Кийин деффектилерден арыла албай кыйналышат. Туура эмес дем алуу, үндү жоготуп алуу ж.б. коркунучтар бар. Ошондуктан буга олуттуу мамиле кылуу зарыл.
Bilesinbi.kg интернеттен алынган кеңештерди сунуштайт
- Ырларды жана музыканы кунт коюп уккула. Музыкалык чөйрөдө иштеген адам ырларды көпчүлүк уккандан башкача угуп, башкача кабыл алат. Кайрыктарды, ноталарды, чыгармадагы түрдүү музыкалык аспаптарды угулушуна көңул бургула.
- Музыкалык терминдерди, жана албетте ноталарды таануу керек.
- Түрдүү ырчыларды угуп, аткаруу манерасын байкагыла.
- Ырдоодо туура дем алуу абдан маанилүү. Акырын мурун менен кыска-кыска дем алууга үйрөнүү зарыл.
- Бүкүрөйбөй түз жүрүүгө үйрөнгүлө. Ырдаганда үн кысылбай чыксын.
- Дикцияңызды оңдоңуз. Сөздөрдү чайнабай, так, түшүнүктүү сүйлөгүлө. Жаңылмачтарды жаттап күндө 2-3 жолу кайталап айтыңыз.
- Ырдап, үнүңүздү диктофонго жаздырыңыз. Ошондо кайсы жерин туура эмес аткарып жатканыңыз түшүнүктүү болот.