Бойдон түшкөндөн кийин сөзсүз алты ай күтүү зарылбы? Гинеколог жооп берет
Саламатсызбы. 8 жума 6 күн болгондо баланын жүрөгү сокпой калып, боюман алдырттым. Андан кийин доктурга көрүнүп, күйөм экөөбүзгө дарыларды жазып берди. Гинеколог 6 ай сактанасыңар деди.
Сөзсүз алты ай күтүшүбүз керекпи? Календарь боюнча август-сентябрь уул болуп жатат.
Раушан Джумагулова
“Эркай” клиникасынын адиси, акушер-гинеколог
Эгер анализдериңиз жакшы, таза чыкса, кош бойлуулукту пландаштыра берүүгө уруксат берилет. Сизге вируска каршы терапия жазылса керек. Дарылануунун бир курсун бүтүрүңүз. Бир айдан кийин анализ тапшырып көрүңүз. Жыйынтыгы жакшы болсо, бойго бүтүрүүгө мүмкүн.
Джамиля Салиева
Гинеколог
Негизи үч айдан алты айга чейин. Мүмкүн болсо жарым жылдан аз эмес. Себеби, биринчиден аял киши физикалык жана моралдык жактан кайра калыбына келиши керек. Экинчиден, текшерүүдөн өтүп, эмне себептен бойдон түшүп калганын аныктоо зарыл. Кийинки кош бойлуулукта мындай коркунучту алдын алуу үчүн профилактикалык иш чаралар жүргүзүлөт.
Ден соолукта болуңуз!