Төрөгөндөн кийин кызгылт кандын келиши нормалдуубу? Гинеколог жооп берет
Саламатсызбы. Төрөгөнүмө үч күн болду. Кызгылт кандын аз-аздан келиши нормалдуубу?
Раушан Джумагулова
“Эркай” клиникасынын адиси, акушер-гинеколог
Ооба, бул нормалдуу. Төрөттөн кийинки суюктуктун келиши (выделения) – лохии деп аталат. 4 жумадан 6-8 жумага (ар кимдики индивидуалдуу) чейин созулат.
Алгачкы 5-7 күндө суюктук кан аралаш, бөлтөк болуп келет. Өңү кочкул кызыл же кызгылт.
Баланы эмизүү жатындын жыйрылышын тездетет, ошондуктан эмизип жатканда ичтин төмөн жагы оорутат.
10-14 күндөн кийин суюктуктун өңү ачыгыраак болуп көлөмү азаят. Жагымсыз жыт болбош керек. Сөзсүз өздүк гигигенаны сактоо зарыл!
Андан кийин өңү саргарып, консистенциясы былжырак болот, бара-бар түсү жок болуп калат.
Эгер эрте эле лохии токтоп калса – бул анын жатынга топтолуп, чыгышында көйгөй жаралды дегенди билдирет. Дароо гинекологго көрүнүп УЗИге түшүү зарыл.
Балаңыздын бешик боосу бек болсун!
Төрөт жана төрөттөн кийинки мезгил тууралуу эң көп берилчү 7 суроо