Резюме түзүүдө эмнелерди эске алуу керек? HR-менеджерден 5 кеңеш
Айнура Кошоева иш берүүчүлөр кимди издеп жатканын жакшы билет. Себеби ал миңдеген резюмелерди окуп чыккан, жүздөгөн кызматкерлерди жумушка алган.
Жумушка кабыл алгыдай кылып кантип резюме түзсөм деп жатсаңыз, ЖЧК "СкайМобайл"дын кызматкерлерди башкаруу боюнча кызматынын директору Айнура Кошоеванын кеңештерине кулак салыңыз.
1. Резюме-сиздин визиттик картаңыз. Мурун көп барактуу резюме жакшы деп эсептелсе, бүгүнкү күндө креативдүү резюмелер утушка ээ болот.
Инфографика менен түзүлгөн резюме - жаңы тренд!
2. Мотивациялык кат сизди топтон сууруп чыгат. Резюмеңиз мыкты деңгээлде жазылбаса да, башында мотивациялык кат берилсе, маектешүүгө өтүп кетүү мүмкүнчүлүгүңүз жогору болот.
3. Резюмеге жеке сапаттарыңызды жазуунун зарылчылыгы жок. Мурунку жумуш ордуңуздан эмнеге жетише алдыңыз, ошону көрсөтүңүз. Мисалы, “мен менеджер болуп иштеп жүргөндө, ишканага 20 миң кардар таап бергем”.
Резюмеге жалган маалыматтырды жазбаңыз. Кандай болсоңуз, өзүңүздү ошондой көрсөтүңүз!
4. Эч жерде иштей элек болсоңуз, резюмеңизди кантип толтурам деп башыңыз катып турса, катышкан курс, долбоор, сынак, клуб сыяктуу нерселердин баарын эстеңиз. Булар да колуңуздан келбесе, “тажрыйбам жок, бирок мен буларга даярмын” деп жазыңыз. Жумуш берүүчүлөр сиздей эле адамдар, аларды кызыктыруунун жолдорун издеңиз. Чыгармачылыкка орун бериңиз!
Биринчи таасир 30 секунд ичинде калыптанат. Сырткы келбетиңизге көңүл буруңуз, маанайыңыз ачык болсун!
5. Жумушка кабыл албай койсо, эч нерсе болбойт. Болгону ал сиз иштей турчу уюм эмес. Өзүңүз үчүн себебин билип коюңуз. Жумуш берүүчүдөн “Өзүмдүн өнүгүүм үчүн билгим келип жатат, мага эмне жетишкен жок”, - деп сураңыз.
Жан дүйнөңүз каалаган ишке орношуңуз, ошондо гана ар бир күндөн ырахат алаласыз!