Кетип калган күйөөмдү кайтаруу үчүн дуба окутсам болобу? Теолог жооп берет
Саламатсызбы? Күйөөм боюмда бар кезде таштап кеткен. Учурда балама бир ай болуп калды. Баламды атасыз чоңойткум келбейт. Жолдошум жакшы адам. Эмнеге кетип калганын өзү да түшүндүрө албайт. Аны бирөөлөр окутуп коюптур. Мен да өзүмө кайтарып окутсам болобу?
Кадыр Маликов
Теолог
Бирөөнү окутуп же дубалатуу - кара дубага же сыйкырчылыкка (колдовство) кирет.
Ислам негиздерине ылайык сыйкырчылык ишенбөөчүлүккө тете болгон чоң күнөө, ага катуу тыюу салынат. Ким бирөөнү окутуп же окуттуруп алса, кылган ишине жооп берет. Себеби ал бул аракети менен кудайга ширк келтирген болот.
Сыйкырчылык – бул жардамды кудайдан эмес кара күчтөрдөн суроо. Андыктан, кара дубага шайтандар катышат.
Сиз бул нерсени жасабаңыз. Курандын белгилүү сүрөөлөрүн окуу менен гана кара дубаны жокко чыгарса болот. Күйөөңүз же өзүңүз бул нерсе менен алектенген молдого кайрылгыла.