Таятамдын үйүн өзүмө жаздыра аламбы? Юрист жооп берет
Саламатсызбы. Айылда таятам менен таенемдин үйү бар, мен ошолордун колунда чоңойгом. Алардын көзү өтүп кеткен. Апамдын 5 эжеси бар. Апам үйдү өзүнө каттатып кийин белек кылып мага өткөрүп берген. 3 таежем үйдөн баш тартып, 2сү болбой коюшкан. Учурда үй менин атымда. Таежелерим менден үйдү талаша алышабы?
Ширин Алмазова
Юрист
Саламатсызбы. Мыйзам боюнча каза болгон таята менен таенеңиздин түздөн-түз мураскери болуп биринчи кезекте алардын балдары, башкача айтканда сиздин апаңыз жана таежелериңиз саналат. Сиз айтып жаткан абалда 2 таежеңиз сотко доо-арызы менен кайрылып, мүлккө болгон укуктарын далилдей алышат.
Бирок белгилүү мөөнөт бар экенин да эске алуу керек. Мисалы, алар мүлктүн катталып жаткандыгын билгенден кийин 3 жылдын ичинде доо арызы менен сотко кайрылышы керек. Ошондой эле 6 айдын ичинде нотариалдык конторага кайрылып мүлккө болгон талапкерлигин тариздеп алууга милдеттүү. Эгер өз убагында кайрылып жетишпесе мүлктү мураска алып калуу тууралуу күбөлүктү ала алышпайт.