Балам бир эле эмчегимди эмет. Эмне үчүн мындай болушу мүмкүн?
Менин эки балам бар. Биринчи кызым сол эмчегимди такыр эмбей койгон, эми уулумду эмизем, ал да ошол эмчегимди эмбей качат. Эмнеден болушу мүмкүн?
“Medcenter.kg” медицина борборунун адиси, маммолог
Сизди көрбөй туруп эмне үчүн мындай болуп жатканын айтуу оор. Балким, үрпүңүз жакшы чыккан эмес, сол тарапты эмген ыңгайсыз болуп жатса керек. Баланын эмгенин жакшылап карап көрүңүз: оозу чоң ачылып, эриндери сыртка кайрылып, эмчекти бекем кармап турушу керек. Эненин үрпү баланын таңдайына тийсин. Эмип жаткан бала үрптүн учун эле эмес, аны толугу менен оозуна салып турганы туура. Эгер үрпүңүз жалпак болсо сүт саагыч (молокоотсос) менен бир аз чыгарса болот. Же атайын “накладка” менен колдонуп көрүңүз.
Бала такыр эле эмбей койсо, ошол эмчектеги сүттү саап бала 2 айга толгуча берип туруу керек.
Эмчектен чыгаргандан кийин сөзсүз маммологго кайрылып, УЗИге түшүңүз.