Мугалим окуучусу менен кат жазышса соттолобу? Юрист жооп берет
Биздин мектепке дене тарбия сабагынан жаңы агай келген. Ал 22 жашта. Жакында эле анын телефонун алып, экөөбүз вотсап аркылуу кат жазыша баштадык. Мен аны жакшы көрүп калдым. Дос кызым "экөөңдүн жазышканыңар билинип калса, агайды соттоп жиберишет",- деди. Бул чынбы?
Асель Рысбаева
Адвокат
Жөн гана телефон аркылуу жазышуу үчүн соттолуп кетет деп айтуу кыйын. Мындай учурда мугалим менен окуучунун ортосундагы кат жазышуулардын мүнөзүн билүү керек. Эгерде, кат жазышууда мугалим кандайдыр бир ыплас аракеттерди жазаса (порнографиялык сүрөттөрдү, видеожазууларды жиберген болсо), мындай жосундар кылмыш деп табылат жана үч жылдан беш жылга чейин эркинен ажыратылат.
Менин кеңешим: Турмушка карай эң алгачкы кадамдар адам жетилип, мектепти, андан кийин окуу жайды аяктап, бир кесиптин ээси болгондо гана башталат. Өспүрүм кыздар/балдар алгачкы жылуу сезимдерди анык, чыныгы сүйүү менен адаштырбай, көбүрөөк окууга көңүл бөлүүсү абзел. Албетте, сырдаша турган учурда ата-энеге кайрылуу туура, болбосо улуу муундан жакын бирөө менен ой бөлүшүү керек.
Ал эми, мугалимдер жашы жете электер менен иш алып барууда абайлап, бой жетип келе жаткан өспүрүм кыздарга/балдарга көңүл көрсөтүүдөн оолак болуусу зарыл. Мугалим үчүн ал окуучу, жана педагог катары анын бирден бир милдети – билим берүү, тарбиялоо!