Айызың келгенде спорт менен машыккан зыян эмеспи? Гинеколог жооп берет
Мен өзүм спорт менен алектенем. Этек кириң келген учурда көп кыймылда болуу зыян эмеспи? Себеби, меники бирде алдыга жылып кетсе, бирде кайра бир жума кечигип келет. Келгенде да 5 күн, анан өтө көп келет. Бул нормалдуубу? Гинекологго көрүнгөндөн уялам.
Раушан Джумагулова
Акушер-гинеколог
Саламатсызбы, урматтуу айым. Сиз спорттун кайсы түрү менен машыгасыз, бардыгы ошондон көз каранды. Эгер сиз штанга көтөрүү менен машыксаңыз албетте, терс таасирин тийгизет. Ал эми физикалык көнүгүүлөр ден соолукка пайдалуу жана организмди бекемдейт.
Айызым туруктуу эмес, анан өтө көп келет деп жатасыз. Сөзсүз гинекологго көрүнүү керек. Себебин, дарыгер сизди жана анализдин жыйынтыктарын көргөндөн кийин айтып берет.
Гинекологго көрүнгөндөн тартынуу бул нормалдуу эле көрүнүш. Сиз чочун адамдын алдында жылаңач калуудан уялып жатасыз. Бирок, биз эч убакытта сиздин мүчөңүздү карап, ага сын пикир айтпайбыз. Гинекологдор үчүн башкысы, сиздин ден соолгуңузга кам көрүү, кандайдыр бир оорулар болсо аны эртелеп аныктоо жана дарылоо.