Атамдын каалоосу менен турмушка чыгып ажыраштым. Мага кеңеш керек
Мен сиздерге мындан мурун дагы жазып кеңеш алгам.
Мени атам мажбурлап турмушка берген, жашай албай ажыраштым. Күйөөмдүн мүнөзү жаш баланыкындай болчу. Эки жума жашаганда эле мени урду.
Азыр ата-энемдин үйүндөмүн. Атамды көргөн сайын жек көрүп кетем. Ал апама "кызың өзү күнөөлү" деп, кылганын моюнуна албайт. Кеңеш бериңиздерчи.
Гүлбарчын Жумабаева
Эрте курактагы никелер жана үй-бүлөдөгү зордук зомбулук боюнча эксперт
Урматтуу окурман, көкүрөгүңүздөгү көйгөйдү ачык айтып кайрылганыңызга чоң рахмат!
Билесизби, сиз азаматсыз! Атаңыз мажбурлап берген күйөөгө байланып жашап калган жоксуз. Болочок жубайыңызды өзүңүз тандаганга укугуңуз бар экендигин сезип, мажбурлаган никеден баш тарттыңыз. Бул чоң эрдик! Өткөн күндөрдүн баарын кереги жок буюмдай унутуңуз, аң-сезимиңизден кесип ыргытыңыз.
Азыркы учурда өзүңүз жана сиздин келечегиңиз бар. Көзүңүздү жумуп, алдыдагы пландарыңыз жөнүндө ойлонуңуз, жашооңуздагы жагымдуу учурларды эстеңиз. Акырындан жаңы пландарды ишке ашырганга киришиңиз. Сиз азаматсыз жана эркин адамсыз. Ийгилик!