Саламатсызбы. Тартынчаак, уялчаакмын. Ушул адатымдын айынан көп нерседен кур калам. Кээде өзүмдү жек көрүп кетем. Тартынчаак, уялчаактыкты кантип жок кылса болот? Жооп үчүн алдын ала рахмат.
Уялчаактыктан кантип арылса болот?
Нурзат Токтосунова
оратор, алып баруучу
Ар бир адам эл алдында тартынат, толкунданат, кээде өзүн жоготуп коет. Бул кадыресе көрүнүш. Сиз бул нерседен эл алдына кайра-кайра чыгып олтуруп арыласыз. Башкача айтканда, көйгөйдөн качып эмес, чечип кутуласыз.
Биринчи көп эмес, азыраак кишинин алдында сүйлөңүз. Бир, эки, анан бара бара 5-6. Ошентип бир күнү уялбай каласыз. Баары жакшы болот десеңиз- баары жакшы болот!
Каныша Кожогелдиева
психолог
Адам кандайдыр бир мүнөздү же адатты өзгөртүүнү кааласа биринчиден эрктүү болушу керек. Сиз “мен уялчаактыгымды өзгөртөм” деген максат коюп, эрктүүлүк менен эмгектенсеңиз, сөзсүз түрдө орундалат.
Болгону башкаларга кичинеден сөз сүйлөө менен кошулуңуз, тартынбастан сүйлөңүз, алар деле сиздей болгон адамдар. Кийин сөздөр көбөйүп, көнүп кетесиз, болгону аракет кылыңыз.