Соттун ар кандай шылтоолоруна тойдум. Кимге кайрылам? Юристтен жооп
2008-жылы уулум төрөлгөндө жолдошум менен ажырашкам. 2009-жылы сотко кайрылсам, алимент төлөөгө милдеттендирген. Бирок ушул күнгө чейин төлөгөн жок.
Мен Ош шаарында турам, ал Кара Суу районунда. Сот аткаруучулар азыркыга чейин ар кандай шылтоолорду айтып келет.
Алиментти төлөбөгөнүнөн 2013-жылы сотко кайрылсам, бир жылга шарттуу түрдө соттолгон. Аны деле тоготкон жок.
Соттун ар кандай шылтоолоруна тойдум. Кайда кайрылып, эмне кылам? Кеңеш бериңизчи.
Нурислам Раимжанов
Юрист
Урматтуу айым, кайгырбаңыз, биз сизге жардам берүүгө аракет кылабыз. Азыр өз баласын багуудан качкан аталар көп.
Алимент төлөбөгөн аталарга карата колдонулуучу мыйзамдар жакшы жыйынтык бербей жатат. Сиздин окуяңыз буга айкын бир мисал.
Билесизби, Кыргыз Республикасынын мыйзамдарын туура колдонуп, иштегиси келбеген мамлекеттик жумушчуларды ишке салууга болот.
Кеңешим, сот аткаруучулардын буга чейин кылган бардык иш материалдарынын көчүрмөсүн алыңыз. Сиз материалдардын көчүрмөсүн алганга жана телефонуңузга тартып алууга укуктуусуз. Эгер материалдарды алуу кыйынчылык жаратса Ош областтык департаментине жазуу түрүндө арыз менен кайрыласыз.
Андан соң редакция аркылуу мени менен байланышсаңыз, мен сот аткаруучулардын кылган иштерин текшерип, сизге жардам берем. Ийгилик!