Кечинде паркта олтурганбыз, милициялар келип...
18 жаштамын. Жигитим 24 жашта. Экөөбүз курорт жакта, кечки саат сегиздер чамасында машинада сүйлөшүп олтурсак, милициялар: “Зордуктоонун көп болгонуна байланыштуу рейд жүрүп жатат, милиция бөлүмүнө алып кетебиз, ата-энеңерге чалып айткыла, чыгарып кетсин”,- деди. Жашыруун сүйлөшүп жүргөнүбүзгө байланыштуу ата-энебизден коркуп, бир жагынан өз укугубузду билбегендиктен акча бергенбиз. КРнын мыйзамы бул окуяга кандай карайт? 18 жашка чыккан КРнын жараны кылмыш кылса ата-энесин чакырабы?
Нурислам Раимжанов
Юрист
Урматтуу окурман, кандайдыр бир кылмыш жасалган учурда мыйзам боюнча жакындарына кабар берилет.
Туура, курорт жакта зордуктоо фактылары көп кездешет. Алдын алуу максатында милиция кызматкерлери рейд жүргүзүп турат. Көмүскөдө сүйлөшүп олтурган болсоңуздар документтериңиздерди текшергенге акысы бар. Керектүү документтер жок болсо милиция бөлүмүнө алып барып өздүгүңүздөрдү тактоого милдеттүү. Эгер документтер бар болуп, эч кандай мыйзам бузбай, сүйлөшүп гана олтурган болсоңуздар кызматкерлер кое бериши керек. Ал эми акча бергениңиздер туура эмес. Түшүндүрө алдым деген үмүттөмүн.