Атама кайтып барсамбы?
Азыркы маалда 30 жаштамын. Ата-энем мен кичинекей кезде ажырашып кетишкен, ошондон бери атасы жок чоңоюп өстүм. Атам болсо мени карабайт, башка үй-бүлөсүнөн бир баласы бар. Менин бар экенимди билсе дагы кабар алып келип койбойт. Ал эми айылдагы байкелер “Атаң болгондон кийин өзүң барып, жолугуп сүйлөш” деп айтышат. Бирок ал мага чоочун адамдай, эмне кылсам болот?
Айгүл Ысыкеева
психолог
Сиз атаңызды эстеп аны унутпай, сөз кылып жүргөн болсоңуз демек атаңызга болгон таарынычыңыз күч. Эгер таарынычыңыз жок болсо ал жөнүндө эстеп дагы койбойт элеңиз. Сиз өзүңүз чоң болгондуктан атаңызга жолугуп ачык эле болгон таарынычыңызды айтып алышыңыз керек.
Сизди түшүнүп турам. Ата-энеңиз кичинекей кезиңизде ажырашып кеткен болсо толук кандуу сүйүүсүз, ата мээримине толбой, анын тарбиясы, көңүл буруусу жетишпей өсүп калдыңыз. Азыр болсо ошол сүйүүнү издеп жаткан чыгаарсыз. Менин сизге кеңешим атаңызга жолугуп анын сизге болгон сезимин билип алыңыз.
Сиздин келгениңизге кубанып, сүйүүсүн, аталык мээримин кайрадан берсе бул жакшы. Эгер тескерисинче каарын көрсөтсө биротоло үмүттү үзүп өз жолуңуз менен өткөнгө кайрылбай кеткениңиз оң. Кандай болгон күндө да бул кадамды жасап көрүш керек, ошондо баары билинет, өзүңүз үчүн бир чечим чыгарасыз.