Кайрадан бактылуу жашагым келет
Мен үй-бүлөлү баланы жакшы көрөм, ал дагы мени жакшы көрөт. Менден алты жашка улуу. Экөөбүз Москвадан нике кыйдырып үч ай жашагандан кийин мен Кыргызстанга келип ата-энеме турмушка чыгаарымды айтсам каршы болуп, башка балага күчкө салып эле берип коюшкан. Эки ай өткөндө ал менен жашай албашымды билип ажырашып, Москвага кетип калгам. Жигитиме жолугуп кайрадан жашай баштадык. Бирок ал мурункудай болбой өзгөрүп кетти. Камкордук кылбайт, сөздөрүмө маани бербейт. Мен болсо ансыз жашай албайм. Болгону мен мурункудай бактылуу жашашым үчүн эмне кылуум керек?
Тынчтык Бакытов
психолог
Урматтуу окурман сурооңуз үчүн чоң рахмат! Көп учурда адамдардын ортосундагы келишпестик баарлашуунун жетишсиздигинен келип чыгат. Бактылуу болуш үчүн жөнөкөй рецепт жок, анткени ар бирибиздин жашоо тажрыйбабыз ар кандай жана бакытты ар кимибиз ар тараптуу элестетебиз. Эгер сизди адамдын өзгөрүүсү ойлонтсо, анда сиз ошол адам менен баарлашып өзүңүздү кызыктырган суроолорду талкуулаңыз. Балким сиз өз сезимдериңиз жөнүндө айтсаңыз ал адам дагы өзгөрүшү мүмкүн. Консультация керек болсо албетте психологго кайрылыңыз.