Мен өзүмдү бактысыз сезем
Мен 15 жаштамын. Мектепте мени классташтарым түшүнбөйт, сүйлөшкүлөрү келбейт, кээде жүрөккө тийчү сөздөрдү айтышат. Үй-бүлөдө кыйынчылыктар бар. Өзүм уялчаак жана жалтаңмын, оюмдагыны айта албайм жана өзүмдү бактысыз сезем. Мындай абалдан кантип арылсам болот?
Гүлмира Молдокулова
психолог
Көбүнчө бала кичинекей кезинде ата-эне жактан көп сын укса, катуу көзөмөлдө болсо, дайыма эскертүү менен жүрсө мунун баары коркунучту пайда кылып, тегерегиндегилерге ишенимин жоготуп уялчаактыгын пайда кылат. Буга кошумча адамдын өзүнөн көбүрөөк терс сапаттарды көрүүсү, өзүн өзү баалоосунун төмөн болушу дагы мисал боло алат. Бул учурда кишилер ойлот, башка кишилер мен жөнүндө мендей болуп ойлойт деп алардын сынынан коркуп калат, бирок мындай болушу мүмкун эмес.
Ойлонуп уялчаактыктын себебин издеп көр, кандай кырдаалда өзүңдү бактысыз, ишенимсиз сезесиң. Ал кандай көрүнүштө болот, кызарасыңбы, колдоруң калтырап кетеби, көзүңдү ала качып түз карай албай каласыңбы. Эң негизгиси өзүңө болгон баалоону көтөр. Бир кагазга жаз, идеалдуу кыз (бала) кандай болушу кажет, кандай сапаттарга ээ болуусу керек, жанына эле өзүңдүн кандай сапаттарың бар ошолорду жаз. Жок сапаттарга кандай кылса алар пайда болот, эмне кылуу абзел, кантип иш алып баруу керек экендигин ойлон. Азыр сен киши өзүн өзгөрткөнгө мүмкүнчүлүгү бар курактасың, аракет кылсаң өзгөрүп кетесиң. Көп китеп оку, азыркы учурда көп маалыматтар бар. Алар менен кабардар болуп өзгөрүүгө кадам ташта.