Канткенде адамдар менен тил табышып сүйлөшө алам?
Жашым 21 де, өзүм көп сүйлөбөгөн баламын. Адамдар менен пикир алышуу жагат, бирок алар мени менен сүйлөшкүсү келбегендей сезилет. Кээ бир учурларда ички дүйнөм жалгыз болуп тажайм. Эмне кылсам болот?
Гүлмира Молдокулова
психолог
Ар бир адамдагы сүйлөшүү муктаждыгы сизде дагы бар. Сиз каалайсыз “мени жанымдагы кишилер мени укса, менин оюум бирөөгө кызык болсо” деп. Бирок баардыгы сиз ойлогондой чыкпай калса өзүңүздү аралда калган жалгыз, жардамсыз адамдай сезесиз. Сизде “баары мени менен сүйлөшкүсү келбейт” деген ой болсо, бул мындай эмес. Көп сүйлөбөгөндүк бул жаман көрүнүш жана көйгөй эмес. Бул болгону сиздин калыптанып калган мүнөзүңүз.
“Өзүм көп сүйлөбөйм, бирок адамдар менен пикир алышуу жагат” деп жазып жатканыңызга караганда сиз “Мен унчукпай олтура берем, силер сүйлөшө берегиле” деген мамиле кылгандайсыз.
Эгер сиз болуп жаткан сүйлөшүүдө башыңарды ийкеп, анда-санда күлүп, олтурсаңыз анда сүйлөшүүгө сиз дагы кошулган болосуз. Сиз бул мимикалардын бирин дагы аткарбай, мостоюп эле олтуруп алган жоксуз да туурабы?
Жеткиликтүү пикир алышуу үчүн эмне кылуу керек?
Ал үчүн сүйлөп берип жаткан адамга кызыктар болуу кажет. Тек гана сүйлөп жаткан сөзүнө, айтып жаткан окуясына же жаңылыктарына маани бербей, ал адамдын сүйлөө эрежесине, эмоциясына, кылып жаткан мимикаларына маани берүү керек. Мындай эрежелерди эсиңизге тутуп, аткарсаңыз адамга жакындыгыңыз билинип, сүйлөшүү сиз каалагандай болот. Бир гана ак ниеттүү кызыкчылык жана аракет сиздин көйгөйгө ачкыч болуп бере алат.