Россияда жүрсөм, апам карап жаткан баланы күйөөм алып кетип калыптыр
Мен 23 жаштамын, 1 балам бар. Кайын журтум менен батыша албай, баламды алып, кетип калгам. Кийин апама калтырып, Россияга иштегени келгем. Эми күйөөм ажырашам деп арыз таштап, баланы апаман алып коюптур. Туулгандыгы тууралуу күбөлүгүн, жана ЗАГСыбызды талап кылып жатат. Кандай чара колдонсом бала өзүмдө калат? Ал болгону бир жашта.
Эркингүл Шаршенбекова
Адвокат
Урматтуу айым! Сиздин учурда Россия жергесинде иштеп жүргөнүңүз баланын биротоло атасына калып калуусуна шарт түзүп жатат. Колдон келсе, тез арада кайтып келип, баланы өзүңүзго алып, соттун чечими менен жашаган жерин аныктап алышыңыз керек. Болбосо, күйөөңүздүн да балага сиздей эле толук акысы, анын алдында милдети жана бала үчүн жоопкерчилиги бар.
Ажырашканга макул болсоңуз, нике күбөлүгун сотко алып барып, никени кырктырып, балага жана бала 3 жашка чыкканга чейин өзүңүзгө алимент өндүрүп алсаңыз болот. Төлөгөнгө каршы чыкса, аталык укуктан ажыратып коюуга толук акыңыз бар.
Ийгилик!
Адвокат Эркингүл Шаршенбекованы инстаграмдагы @advokat_kg_erkingul баракчасы аркылуу тапсаңыз болот.
Башкы беттеги сүрөт интернеттен алынды.