Сиңдимдин эпилепсиясы күчөп жатат
Менин сиңдим 19 жашта. 3 жашынан бери эпилепция деген оору менен ооруйт. Ошондон бери атамдардын барбаган молдосу, дарыгерлери калбады. Көпчүлүк молдолор алдап кетти. Мына ушундан улам үмүтүбүз дагы үзүлүп калгандай. Улам оорусу күчөп, катуулап бара жатат. Эмне кылсак болот?
Сулайманова Жазгүл
Невролог
Сиңдиңизди текшерип, анализдерин көрмөйүн бир нерсе деп айтууга болбойт. Дарыгерлер эпилепсия деп чечим чыгарса, анда ал акыркы диагноз болуп саналат. Эпилепсия дарты аныкталганга чейинки карышуулар болсо башка оорунун белгиси болгондуктан, эпилепсия болуп эсептелинбейт. Эпилепсиянын түрлөрү аябай көп. Андыктан сиңдиңизди неврологго алып барыңыздар. Мээсин текшерүүгө алып, элекетроэнцефалограммасын (ЭЭГ) жасагандан кийин гана, кайсы түрү экени билинет. Анан түрлөрүнө жараша атайын дары-дармектерди жазып беребиз. Эгерде жазып берген дарыларды убагында ичип турса таасир берет. Бирок айта кетейин эпилепсиянын оор түрүнө чалдыккандарга таасир бербей коюшу дагы мүмкүн. Андыктан ата-энеңизге айтып, молдо, бакшыларга эмес, неврологго кайрылгыла. Дарыгердин айтканын аткарып, өз убагында дары ичип турса, эпилепсиядан сакайып, нормалдуу жашоого кайтып келсе болот.