Күйөөмдүн уруксаты жок балдарымды Москвага алып кете аламбы?
Саламатсызбы! Менин эки балам бар, сурайын дегеним мен балдарым менен Москвага кетейин дегем. Күйөөм менен жашабай калгам, балдар күйөөмдүн атында. ЗАГСда менде жок. Сураныч кантип алып кетсем болот? Алдын ала рахмат!
Нурислам Раимжанов
"Справедливость" укук коргоо уюмунун юристи
Урматтуу окурман! Буга чейин ата-эненин бири баласын чет өлкөгө алып кетүү үчүн экинчи ата-эненин макулдугу керек болчу. Ал эми, эреже катары, алар чогуу жашабаса, экинчиси баш тартып коер эле.
Бүгүнкү күндө КРнын Үй-бүлө кодексине өзгөртүүлөр жана толуктоолор киргизилген.
Ата-энелердин ортосундагы баланы Кыргыз Республикасынын аймагынан тышкары, анын ичинде дарыланууга, спорттук жана башка мелдештерге, эс алууга, туугандары менен жолугушууга убактылуу чыгаруу маселеси боюнча талаш-тартыштар келип чыккан учурда сотко кайрылуу керек. Сот эгер бала он жашка толгон болсо анын дагы пикирин милдеттүү түрдө эске алуу менен иш өндүрүшкө кабыл алынган күндөн тартып бир айдан ашпаган мөөнөттө талашты кечиктирбестен карап чыгат жана чечет.
Демек, сиз сотко кайрыласыз. Сот бардык жагдайларды изилдеп чыгып, баланы өлкөдөн алып чыгууну сиздин пайдаңызга чечиши мүмкүн.