Мектептин камерасы биздин үйдү кошо тартат. Ошону кандай кылсак болот?
Саламатсызбы! Биздин үй мектептин жанында. Мектепке жакында видео көзөмөл орнотулган. Бир камерасын мектептин көмүр канасына каратып коюшкан. Эми ошол камера биздин үйдүн, эшиктин алдын кошо алат экен. Үй-бүлө болгондон кийин ар кандай ситуация болот. Үйдүн короосунда кенен басып туралбай калдык. Камера бизди кошо тартып жатат деп. Мектепте карап отурушат да экранды. Ошону кандай кылсак болот? Бизде жеке жашоо дегеним. Биздин баскан турганыбызды, корообузда эмне болуп жатканын мектептегилердин көрүшүн каалабайм. Биз айылда турабыз.
Нурислам Раимжанов
"Справедливость" укук коргоо уюмунун юристи
Урматтуу окурман! Албетте, ар бир адам жеке турмушунун кол тийбестигине, абийиринин жана ар-намысынын корголушуна укуктуу, бул сиздин Конституциялык укугуңуз. Ошондой эле Кыргыз Республикасынын Конституциясынын 29-беренесинин 4-бөлүгүндө "Мыйзамда белгиленген учурларды кошпогондо, адамдын макулдугусуз анын жеке турмушу тууралуу маалыматты, купуя маалыматты жыйноого, сактоого, пайдаланууга жана жайылтууга жол берилбейт" деп көрсөтүлгөн.
Демек, сиз айтып жаткан жагдайда, эгерде макул болбосоңуз, анда сиздин жеке жашооңузга байкоо жүргүзүп видеотасмага тартууга эч кимдин укугу жок. Сиз арыз менен ошол мектептин жетекчилигине кайрылыңыз. Маселе сиздин пайдаңызга чечилбесе, прокуратурага кайрылсаңыз болот.