Кызымды эмделбеген деп бала бакчага албай жатышат. Эмне кылам?
Саламатсызбы! Биз өз каалообуз менен кызыма эмдөө алган эмеспиз. Бала бакчага берейин десем албай жатышат. Эмне кылуум керек? Каяка кайрылсам болот?
Нурислам Раимжанов
"Справедливость" укук коргоо уюмунун юристи
Сизге же балдарыңызга бала бакча же мектеп жактан эч кандай көйгөй болбошу керек. Кыргыз Республикасынын Жугуштуу ооруларды иммунопрофилактикалоо тууралу мыйзамынын 5-беренесинде “Кыргыз Республикасынын жарандары иммунопрофилактиканы жүргүзгөн учурда - эгерде башка ченемдик актыларда башкалар көрсөтүлбөсө, профилактикалык эмдөөдөн баш тартууга укуктуу” деп көрсөтүлгөн. Бүгүнкү күндө эмдөө (прививка) ыктыярдуу болуп эсептелинет. Сиздин же балдарыңыздын эркине каршы эмдөө жүргүзө алышпайт.
Эгер бала бакча, мектептен көйгөй туулса прокуратура органдарына кайрылсаңыз болот. Анткени Кыргыз Республикасынын Конституциясынын 40-беренесинин 2-бөлүгүндө, “Ар ким өз укугун жана эркиндигин мыйзам менен тыюу салынбаган бардык ыкмалар менен коргоого укуктуу” деп көрсөтүлгөн.