Жарым жыл мурун мени зордуктаган жигитти сотко бере аламбы?
Саламатсызбы! Менин юристке суроом бар. Жарым жыл мурун зордукталгам. Ата-энем, туугандарым, эч ким билбейт. Ал бала армияда, үйлөнүшүн айтсам, "мен кайдан билем, сен азыр эч ким менен жатпай элесиңби" деп ишенбей жатат. Азыр үстүнөн арыз жазсам каралабы? Сот иши жүрөбү?
Нурислам Раимжанов
"Справедливость" укук коргоо уюмунун юристи
Урматтуу окурман! Албетте, ар бир күнөөлүү адам өз жазасын алышы керек, арыз жазсаңыз болот. Ага кошумча колуңузда далилдер керек болушу керек. Далилдөө үчүн соттук медициналык экспертиза болушу зарыл. Сизде дагы башка кандай далилдер бар, айталы, күбөлөр, үн жазуулар, коркутуп жазган каттары деген сыяктуу. Эч кимге билдирбегениңизди айтыпсыз. Бул маселеде, милиция кызматкерлери сизди чакырат, үйүңүзгө соттон кагаз келет. Мындай иштин билинбей калышы татаал болот. Ошондуктан, бул нерсени жакындарыңызга айтып, алар менен чогуу иш алып барсаңыз, бир тараптан сизге колдоо болот. Окуя болгон аймактагы милицияга арыз менен кайрылыңыз.